بەڵین ئیسماعیل: پاشەکەوتى موچەى موچەخۆران، قەرز و ئەرکە لەسەر حکومەت و دەبێت بیداتەوە

پەرلەمانتارێکى گۆڕان دوپاتى دەکاتەوە؛ موچەى پاشەکەوت کراوى موچەخۆران لەم کابینەیەى حکومەت و بە بڕیارى وەزیرى دارایی و ئابورى کراوەتە قەرز، بەوپێیە لە ئەمانات دەرچوە و قەرز و ئەرکە لەسەر حکومەت و دەبێت بیداتەوە.

بەڵێن ئیسماعیل، پەرلەمانتارى فراکسیۆنى گۆڕان و ئەندامى لیژنەى دارایى پەرلەمان لەبارەى پاشەکەوتى موچەى فەرمانبەران و ئەو لێدوانانەى لەماوەى رابردودا بونە هۆى نیگەرانى موچەخۆران، رایدەگەیەنێت؛ لە یاساى چاکسازى و یاسا بەرکارەکان ئەوە جێگیر کراوە کە حکومەتى هەرێم پابەندە بە دانەوەى ئەو پاشەکەوتانەى لە موچەى فەرمانبەران و موچەخۆران کراوە.

دەشڵێت: پێشتر و تا کابینەى پێشو، ئەو پاشەکەوتى موچانە بە تەئمینات دانرابو، بەڵام لەم کابینەیەدا واتە کابینەى نۆى حکومەتى هەرێم و بە بڕیارى وەزارەتى دارایى و ئابورى ئەو پارەیە کراوەتە قەرز، چونکە تەئمینات لە حکومەت دواى دە ساڵ دەبێتەوە بە موڵکى حکومەت، بەڵام ئێستا و دواى ئەو بڕیارە ئەوە یەکلا بوەتەوە کە ئەو پارەیەى پاشەکەوت کراوە هەق و مافى موچەخۆرانە و قەرز و ئەرکە لەسەر حکومەتى هەرێمى کوردستان بیداتەوە.