پەرلەمانتارانی گۆڕان سەردانی مانگرتوانی هەدەپە دەکەن

27/02/2019

فراکسیۆنی گۆڕان پاڵپشتی خۆی بۆ مانگرتوانی هەدەپە لە باشوری كوردستان دوپاتکردەوە، هەروەها داوای دەستپێكردنەوەی پڕۆسەی ئاشتی دەكەن لە باكوری كوردستان و توركیا.

بەڵێن ئیسماعیل، جێگری سەرۆكی فراكسیۆنی گۆڕان لە پەرلەمانی كوردستان رایگەیاند؛ بۆ ئاگاداربون لە رەوشی تەندروستی ناسر یاگز و تەواوی مانگرتوان، سەردانی بارەگای هەدەپەیان لە هەولێر كردو پاڵپشتی خۆشیان بۆ مانگرتوان دوپات كردەوە و بەڵێنیاندا ئەوەی لە توانایاندا بێت لە پەرلەمانی كوردستانەوە کاری بۆ دەکەن بۆ بەدیهێنانی داواکاری مانگرتوان.

فراکسیۆنی گۆڕان بە پێویستی زانی جارێكی دیكە پڕۆسەی ئاشتی لە باكوری كوردستان و توركیا دەست پێبكاتەوە، بۆ ئەوەی ئەو دۆخەی ئێستا لە باكوری كوردستان دەگوزەرێت باشتر بێت و ئەوانیش بە هەمو شێوەیەك هاوكار و هەماهەنگ دەبن.

لە دژی گۆشەگیریی سەر عەبدوڵا ئۆجالان، رێبەری زیندانیکراوی پەکەکە، نزیکەی (100) رۆژە لە باشوری کوردستان نوێنەرایەتی پارتی دیموکراتی گەلان (هەدەپە) مانگرتیان راگەیاندوە.
ئا/ هەژار ئەنوەر