سۆز عەبدولقادر: نە داهات نە خەرجى دیار نییە، بۆیە پێویستە پرۆژەیاساى بودجە بنێردرێتە پەرلەمان

ئەندامێکى پەرلەمان ئاماژە بەوە دەکات کە مەترسیی ناوخۆیی و دەرەکى لەسەر هەرێمى کوردستان هەیە، لەو سۆنگەیەوە فراکسیۆنەکەیان بەیاننامەیەکى ئاڕاستەى سەرۆکایەتى پەرلەمان و حکومەت و لایەنە پەیوەندیدارەکان کردوە کە ئامانج لێى گەڕانەوەیە بۆ سەر مێزى گفتوگۆ و ئامادەکردنى پڕۆژە یاساى بودجە لەپێناو رێگرتن لە مەترسییەکان و شەفافییەت لە داهات و خەرجى.

سۆز عەبدولقادر، ئەندامى پەرلەمانى کوردستان لە فراکسیۆنى گۆڕان، رایدەگەیەنێت؛ هەرێمى کوردستان لە دۆخێکى مەترسیداردایە چ لە ئاستى ناوخۆ چ لە سەر ئاستى دەرەوە، فراکسیۆنى گۆڕان لە سۆنگەى بەرپرسیارێتیەوە دوێنێ بەیاننامەیەکى ئاڕاستەى سەرۆکایەتى پەرلەمان و حکومەت و لایەنە سیاسییەکان کرد لەپێناو رێکخستنەوەى ناوماڵى کورد و گەڕانەوە بۆسەر مێزى گفتوگۆ.

دەشڵێت:"بودجە بابەتێکى حەیاتییە و ماناى سیاسەتى دارایی حکومەتە، چەند ساڵێکە نەهاتوەتە پەرلەمان بە پاساوى جیاواز، لەم دۆخەى کوردستان دوئیدارەیی و دو دارایی هەیە و خەڵک هەست بە جیاواى و ناجێگیرى دەکات، تائێستا بودجەیەکى یەکگرتو نیە لە هەرێمى کوردستان، نە ژمێرەى کۆتایی هاتوەتە پەرلەمان واتە نە داهات نە خەرجى دیار نییە، دەبێت ئەوانە لە پڕۆژە یاساى بودجە دیارى بکرێت و بنێردرێتە پەرلەمان بۆئەوەى دوبارە داهات بەشێوەیەکى هاوسەنگ بەسەر ناوچەکان و سێکتەرە جیاوازەکان و خزمەتگوزارییەکان و بەکاربردن دابەش بکرێ، ئەمە تاڕادەیەک شەفافییەتیش دێنێتە ئاراوە  و رێ لە گەندەڵى و بەهەدەردان و ناڕونى دەگرێت"