رزگار محەمەد نەگڕەیی: دەستوەردان و ناکۆکى نێوان یەکێتى و پارتى هۆکارى کۆنەبونەوە و پەکخستنى دانیشتنەکانى پەرلەمانە

08/01/2023

ئەندامێکى پەرلەمانى کروردستان رایدەگەیەنێت؛ دەستوەردان و ناکۆکى نێوان یەکێتى و پارتى هۆکارى کۆنەبونەوە و پەکخستنى دانیشتنەکانى پەرلەمانى کوردستانن و هەر ئەوەش هۆکارى نەناردنى پڕۆژە یاساى بودجەیە بۆ پەرلەمان، لەکاتێکدا پێویستە پەرلەمان بەشیوەیەکى یاسایی و پەیڕەوى کارەکانى خۆى بەڕێوەببات و چاودێرى کارەکانى حکومەت و دامەزراوەکان و بکات و پڕۆژە یاسای گرنگ لە بەرژەوەندى خەڵکى کوردستان دەربکات.

زیاتر لە مانگێکە پەرلەمانى کوردستان کۆنەبوەتەوە و کارەکانى پەکى کەوتوە، لەبارەى هۆکارى ئەو پەکخستنەوە، رزگار محەمەد نەگڕەیی ئەندامى پەرلەمانى کوردستان لە فراکسیۆنى گۆڕان لە لێدوانێکدا بۆ سایتى (گۆڕان)، ئاماژە بەوە دەکات؛ پەککەوتنى کارەکانى پەرلەمان بەهۆى ناکۆکى یەکێتى و پارتییەوە بابەتێکى نوی نییە و لە یەکەم خولى پەرلەمانەوە چەندین جار کارەکانى پەرلەمان بۆ ئەو ململانێ و ناکۆکییانەوە لەلایەن ئەو دوهێزەوە پەک خراوە کە ئەو ناکۆکیانەش لەپێناو بەرژەوەندى باڵاى خەلک و باشتر ئیدارەدانى دامەزراوەکان نییە، بەڵکو بەهۆى ناکۆکی و بەرژەوەندییە حیزبیەکانیانەوەیە.

دەشڵێت: ئێستاش بە ئیعاز و دەستوەردانى حیزبى پەرلەمان کۆنابێتەوە و پەکخراوە، لەکاتێکدا دەبو گرنگى پەرلەمان بپارێززرایە بەوپێیەى مەرجەعى یاسایی و دامەزراوەیەکى گرنگ و گەورەى هەرێمى کوردستانە، بەڵام پارتى و یەکێتى ئەوە نابینن و نایانەوێت پەرلەمان کارابێت و کارەکانى خۆى بەشێوەیەکى پەیڕەوى بەڕێوە ببات و هەمیشە دەیانەوێت بەرامبەر حکومەت و دامەزراوەکانى دیکە بێ رۆڵ و کاریگەرى بکەن.

لەبارەى نەناردنى پڕۆژە یاساى بودجە بۆ پەرلەمان و رۆڵى لە بەردەوامیدان بە ناڕونى لە داهات و خەرجییەکان، ئەندامەکەى پەرلەمانى کوردستان دەڵێت: ئەوەش لە چوارچێوەى بەرژەوەندى حیزبى دو هێزەکەى دەسەڵات و بێ رۆڵکردنى پەرلەمان و دەسەڵاتدانە بە حکومەت، لەکاتێکدا نەهاتنى بودجە بۆ پەرلەمان گرفتێکى گەورەیە و وادەکات کە رون نابێت داهات چەندە و چۆن کۆدەکرێتەوە و دەچێتە گیرفانى کێ و چۆنیش خەرج دەکرێت،
ئەگەر ساڵانە یاساى بودجە پەسەند بکرێت، دەزانرێت داهات چەندە و بەشێوەیەکى پلان داڕێژراو و هاوسەنگ و پێویستى بەسەر سێکتەرە جیاواز و وەزارەتە جیاوازەکان دابەش دەکرێت و دەخرێتە خزمەتى کۆى سێکتەرەکان و هاوڵاتیانەوە.


هەواڵی زیاتر