‎لێپرسراوى نوسینگەى هەڵەبجەى پەرلەمان: پارێزگاى هەڵەبجە تایبەتمەندى هەیە و یەکێک بوە لە تەوەرە سەرەکییەکانى کۆبونەوەکانمان لە بەغدا

لێپرسراوى نوسینگەى هەڵەبجەى پەرلەمانى کوردستان رایدەگەیەنێت؛ پارێزگاى هەڵەبجە بۆ ئێمە گرنگى و تایبەتمەندى زۆرى هەیە، بۆیە لە سەردانەکەشمان بۆ بەغدا یەکێک لە تەوەرە سەرەکییەکان پرسى رێکارە کارگێڕییەکانى بە پارێزگاکردنى هەڵەبجە و بە فەرمى ناساندن و کردنەوەى مەرزى سازان و زیادکردنى ژمارەى دامەزراندنى پاسەوانى سنوربوە بەتایبەت بۆ سنورى هەڵەبجە.

شاخەوان رەئوف بەگ، لێپرسراوى نوسینگەى هەڵەبجەى پەرلەمانى کوردستان ئەمڕۆ یەکشەممە (2023/1/29)، لە کۆنگرەیەکى رۆژنامەوانیدا لەبارەى ناوەڕۆکى سەردانەکەیان بۆ بەغدا و کۆبونەوەکانیان لەگەڵ لایەنە لیژنەى ئاسایش و بەرگرى ئەنجومەنى نوێنەران و سەرۆک کۆمار و نوێنەرایەتى حکومەتى هەرێم و لایەنە پەیوەندیدارەکان رایگەیاند: پارێزگاى هەڵەبجە تەوەرێکى سەرەکى دیدار و کۆبونەوەکانمان بوە کۆمەڵێک داواکاریمان پێشکەش کردوە لەوانە تەواوکردنى رێکارە کارگێڕییەکانى بەپارێزگابونى هەڵەبجە و کردنەوەى مەزرى سازان بە رەسمى کە دەبێتە هۆى کرانەوەى زیاترى هەڵەبجە و سودى ئابوریشى بۆ خەڵکى ناوچەکە دەبێت لەگەڵ زیادکردنى ژمارەى دامەزراندنى هێزەکانى پاسەوانى سنور کە سێ هەزار کەس بۆ هەرێمى کوردستان دیاریکراوە، جەختمان کردوەتەوە لەوەى ئەو ژمارەیە کەمە و پێویستە زیاد بکرێت بەتایبەت بۆ هەڵەبجە کە ناوچەیەکى بەرفراوانى سنوریی هەیە.

شاخەوان رەئوف بەگ دەشڵێت: لە دیدارەکاندا جەختمان کردەوە لەوەى پارێزگا هەیە نیوەى هەڵەبجە قوربانى نەداوە لەسەر دەستى رژێمەکانى پێشو، بەڵام لەلایەن حکومەتى عێراقەوە کارى گەورەى بۆ کراوە، بۆیە پێویستە تایبەتمەندى و قوربانیدانى هەڵبەجە لەبەرچاو بگیرێت.

ئاماژە بەوەش دەکات؛ هەریەکە لە لیژنە پەرلەمانییەکە و سەرۆک کۆمار و نوێنەرایەتى حکومەتی هەرێمیش کۆک بون لەگەڵ رەوایەتى داواکاریەکانمان و بەڵێنیاندا لەگەڵ ئەنجومەنى وەزیران گفتوگۆ بکەن بو بە فەرمى ئاگاداریان بکەنەوە بۆ جێبەجێکردنى داواکاریەکانمان و سکرتاریەتێکیشمان پێکهێناوە لەنێوان لیژنەى ناوخۆ و ئاسایش و ئەنجومەنە خۆجێییەکانى پەرلەمانى کوردستان و لیژنەى ئاسایش و بەرگرى ئەنجومەنى نوێنەرانى عێراق بۆ چاودێرى و بەدواداچونى ناوەڕۆکى تەوەر و کۆبونەوە و داواکارییەکانمان و
لیژنەکەشمان بانگهێشتکردوە بۆئەوەى لە ئایندەیەکى نزیکدا سەردانى هەرێمى کوردستان و ناوچە سنورییەکان بکەن.