ئەنجومەنی قەزای کفری راگەیەندراوێکی بۆساڵیادی راپەڕینی شارەکە بڵاوکردەوە

ئەنجومەنی قەزای کفری، بەبۆنەی ساڵیادی راپەڕینی قەزای کفری، رایدەگەیەنێت؛ ڕاپەرین وەک بڕینی قۆناغێکی گرنگ لەوێستگەی سیاسی و خەباتی شۆڕگێری پەرلەمان و حکومەتی ھەرێمی لێ بەرهەمھات، بەڵام بەداخەوە، دوای (٣٢) تائێستا ئەم شارە دێرینەی کوردستان کە بەشاری وەزیران و ئەدیبان و ھونەرمەندان و شوێنەوار و پێشمەرگە و شەھیدان ناسراوە، خەڵکەکەی و شارەکەش گلەیی و بێزاریان هەیە لە بێ خزمەتی و بێکاری و زیادبون و بەردەوامی دیاردەی کۆچکردن.

لە راگەیەندراوەکەدا هاتووە: لە (٣١) ساڵی رابردوو و بەئێستاشەوە حکومڕان و دەسەڵاتدارى سەرجەم جومگە و یەکەئیداری و خزمەتگوزاری و ئەمنیەکان نەیتوانیووە بەباشی خزمەت بکات ، شارێک دەوڵمەند بەنەوت و کانزا، بەڵام بەداخەوە تەنھا دوکەڵەکەی بۆ خەڵکەکەیەتی، شارێک پڕ لەشوێنەوار و گەشتووگوزار و سەرچاوەی ئاو بەڵام بەداخەوە رۆژ بەرۆژ شوێنەوارە مێژوویەکانمان دەڕوخێت بەبەرچاوی بەرپرسانەوە فەرامۆشتر دەکرێن .
دەشڵێت: ئێمە لە بزوتنەوەی گۆڕان ھەمیشە هەوڵ و ئامانجمان خزمەت و گەیاندنی دەنگ و داخوازیەکانی شار  بووە و بەردەوامیش دەبین.

دەقى راگەیەندراوەکە:
کەسوکاری سەربەرزی شەھیدان و تێکۆشەران و شەھیدانی ئەنفال و پێشمەرگە دێرینەکان .
 لە (٣٢)یەمین ساڵیادی ڕاپەرینی جەماوەری شارەکەماندا گەرمترین پیرۆزبایتان ئاراستە ئەکەین بۆ ڕزگار بوون لەجەور و ستەمی ڕژیمی فاشیست و دیکتاتۆری بەعس.
چەپکە گوڵی نێرگزی بەھار دەسکەنەی ڕووحی شەھیدان دەکەین و سەرمان نەوی دەکەین لەئاستی خەبات و قوربانیدانیان .
راپەرین وەچەرخانێکی گرنگ بوو لە مێژووی میللەتەکەمان و لەدوای خەباتی چەندین دەیە بەدەستھات، بەرنامە رێژی ئەندازیاری ڕاپەرین ڕەوانشاد نەوشیروان مستەفا و بەتێکۆشانی ھێزی پێشمەرگە و بەتایبەت پارتیزانەکان و چۆڵنەکردنی ناوچەکانی گەرمیان و کوێستان و دروستکردنی رێکخستنە نھێنیەکان لەناو شار بۆ جۆشدانی خەڵک لەبەرەبەیانی (١٠/٣/١٩٩١) بە فەرماندەیی شەھید حەمەڕەش و عوسمانی حاجی محمود و پێئشمەرگە پارتیزانەکان و ھاوکاری ڕێکخستنەکانی (سرک) بۆ یەکەمجار شاری کفری و باوەشاسوار ھەوای ئازادی ھەڵمژی.
راپەرین وەک بڕینی قۆناغێکی گرنگ لە وێستگەی سیاسی و خەباتی شۆڕگێری پەرلەمانی کوردستان و حکومەتی ھەرێمی لێ بەدەستھات. لەدوای (٣٢) ساڵ بەداخەوە تائێستا ئەم شارە دێرینەی کوردستان کە بەشاری وەزیران و ئەدیبان و ھونەرمەندان و شوێنەوار و پێشمەرگە و شەھیدان ناسراوە بەداخەوە لەدوای سێ دەیە  ھێشتا خەڵک و شارەکەشمان گلەیی و بێزاری و بێخزمەتی و بێ کاری و کۆچردن و ھتد تیادا بەردەوامە . ئێمە لە بزوتنەوەی گۆڕان ھەمیشە خزمەتمان کردووە لە پێناو گەیاندنی دەنگ و داخوازیەکانی شار .
لە سی و یەک ساڵی رابردوو و بەئێستاشەوە کێ حوکمڕان و سەرجەم جومگە و یەکەئیداری و خزمەتگوزاری و ئەمنیەکانی بەدەستەوەیە و نەیتوانیووە بەباشی خزمەت بکات .
شارێک کە دەوڵمەند بەنەوت و کانزا، بەڵام بەداخەوە تەنھا دوکەڵەکەی بۆ خەڵکەکەیەتی . شارێک پڕ لەشوێنەوار و گەشتووگوزار و سەرچاوەی ئاو بەڵام بەداخەوە رۆژ بەرۆژ شوێنەوارەمێژوویەکانمان دەرووخێت بەبەرچاوی بەرپرسانەوە فەرامۆشتر دەکرێ .
ئومێد دەکەین وەک ئەم یادە بکەینە بۆنەیەک بۆ ئاشتکردنەوەی خەڵک  خزمەتکردنی شارەکەمان  و بەرپرسانی ئیداری و بەتایبەت یەکێتی نیشتیمانی کوردستان  کە سەرجەم حکومەتی لەم سنوورەی بەدەستە ئاوڕی جدی بدەنەوە لەشارێک لە رابردوو زۆرترین قوربانی و نەخشی ھەبووە لە مێژووی میللەتەکەمان .

دووبارە یادی ڕاپەرین پیرۆز بێت
نەمری بەشەھیدانی ڕاپەرین
سەربەرزی بۆ ئەوانەی بەشدار بوون و بەپاکی مانەوە

ئەنجوومەنی قەزای کفری بزوتنەوەی گۆڕان
١٠/٣/٢٠٢٣