سۆز عەبدولقادر: ئەو کاتانە بودجە بۆ پەرلەمان نێردراوە کە فراکسیۆنى گۆڕان ئۆپۆزسیۆنێکى بەهێز و کاریگەر بوە

ئەندامێکى پەرلەمانى کوردستان رایدەگەیەنێت؛ نەناردنى پڕۆژە یاساى بودجە بۆ پەرلەمان بۆ شاردنەوەى داهات و خەرجى و بێ رۆڵ کردنى پەرلەمانە.

سۆز عەبدولقادر، ئەندامى فراکسیۆنى گۆڕان لە پەرلەمانى کوردستان، ئاماژە بە گرنگى پڕۆژە یاساى بودجە دەکات بۆ کۆمەڵیک ئامانجى گرنگ، لەوانە؛ دیارکردنى داهات و خەرجییەکان، پەیڕەکردنى شەفافییەت، میکانیزمى بەرەنگاربونەوەى گەندەڵى و عەدالەتى جوگرافى لە پڕۆژەکان و خزمەتگوزارییەکان بۆ هاوڵاتییان و پێدانى موچەى موچەخۆران.

ئەو پەرلەمانتارەى گۆڕان رەخنەى ئەوە دەرگرێت کە (10) ساڵە یاساى بودجە لەلایەن حکومەتەوە نەنێردراوەتە پەرلەمان، "ئەوەش کیشەیەکى گەورەى دروست کردوە و ئامانجى شاردنەوەى داهات و خەرجییە، لەماوەى ئەو هەمو ساڵەى رابردودا تەنها چوار ساڵ بەدواى یەکدا بودجە هاتوەتە پەرلەمان ئەویش ئەو کاتانە بوە کە فراکسیۆنى گۆڕان ئۆپۆزسیۆنێکى بەهێز و کاریگەرى نێو پەرلەمان بوە".