باژێروانى کەلار: بزوتنەوەى گۆڕان وەک رابردو پڕۆژەى هەیە بۆ خزمەت و چاکەى گشتى و داکۆکى لە داواى خەڵک دەکات

باژێروانى کەلارى بزوتنەوەى گۆڕان پاڵپشتى بۆ داخوازییەکانى خەڵک و دابینکردنى پێداویستییەکان دوپات دەکاتەوە و رایدەگەیەنێت؛ هاوشێوەی سەرەتاکانی دروستبونی، بزوتنەوەى گۆڕان  لەپێناو خەڵکی کوردستان و پرۆژە خزمەتگوزاریەکانیەوە ئامادەی هەموو شێوازەکانى خزمەت و قوربانیدانە.

ئەنجومەنی قەزای کەلاری بزوتنەوەی گۆڕان پێشوازی لە نوێنەرانی ژمارەیەک لە ڕێکخراوەکانی کەلار دەکات و دوای گوێگرتن لە راو سەرنجی نوێنەری رێکخراوەکان، فەیسەڵ حاجی حەسەن باژێروانی مەکۆی کەلار جەختى لەوە کردەوە کە بزوتنەوەی گۆڕان هەمیشە رۆڵی رێکخراوەکان بەگرنگ و کاریگەر دەزانێت و پاڵپشتى هەنگاو و پڕۆژەکانیان دەکات لەپێناو خەڵکدا.

هەروەک دوپاتى کردەوە کە ئەوان وەک مەکۆ و خودى بزوتنەوەى گۆڕان و فراکسیۆن و تیمەکانى لە رابردودا و بۆ ئیستا و داهاتوش پرۆژەیان هەیە بۆ باشکردنى ژیانى خەڵک و پێشکەشکردنى باشترین خزمەتگوزارى لە رێگەى دامەزراوەکانەوە و وتیىشی: بزوتنەوەی گۆڕان لەپێناو چاکەی گشتی و  دابینکردنی ژیانێکی شکۆمەدانە و ئازاد دروست بووە و  لەئێستاشدا هاوشێوەی سەرەتاکانی دروست بوونی  لە پێناو خەڵکی کوردستاندا لەڕێگەی پرۆژە خزمەتگوزاریەکانیەوە ئامادەی هەموو قوربانیدانێکە.