باژێروانی كەلار: پێشوازی هەڵسوڕاوان لە دیداری گۆڕانخوازان و جوڵەكانی بزوتنەوەكە ئاماژەیە بۆ بەردەوامی ویستی بەهێزبوونەوە

رۆژی شەممە (٤ی١٠ی٢٠٢٥)، دانا ئەحمەد مەجید، ڕێکخەری گشتی بزوتنەوەی گۆڕان بە سەرۆكایەتی شاندێك بۆ نزیکبونەوەی زیاتر و کۆبونەوە لەگەڵ خەڵك و هەڵسوڕاوانی سنورەكە، سەردانی هەریەك لە قەزای دەربەندیخان و قەزای كەلاری ناوەندی گەرمیانی كرد و لەلایەن ژمارەیەكی بەرچاوی هەڵسوڕاوان و گۆڕانخوازانەوە پێشوازیان لێكرا و لە كۆمەڵێك دیدار و كۆبونەوەدا بەرنامەی نوێی بزوتنەكەی روونكردنەوە بەتایبەت دوای دیداری بەرفراوانی گۆڕانخوازان.

لای خۆیەوە مەریوان رەحیم باژێروانی كەلاری بزوتنەوەی گۆڕان، لەبارەی سەردانەكەوە رایگەیاند: كاك دانا بە ئێمەی گەرمیانی غەریب نیە و تا ئێستا شووێن دەستی خزمەتی بە گەرمیانەوە دیارە و هەڵسوڕاوانیش پاڵپشتی هەنگاوەكانی دەكەن بۆ سەرپێخستنەوە و بەهێز كردنەوەی بزوتنەوەی گۆڕان.

دەشڵێت: پێشوازی هەڵسوڕاوان چ لە دیداری گۆڕان چ لەم سەردانانەدا ئاماژەیە بۆ بەردەوامی بزوتنەوەی گۆڕان ویستی خەڵك و گۆڕانخوازان بۆ پشتیوانی بزوتنەوەكەیان بەتایبەت بۆ ئەم قۆناغە كە بۆشاییەكی گەورە هەیە لە گۆڕەپانی سیاسی و پاڵپشتی خەڵك.