عوسمان بایدەمیر لە سیمینارێکى ژورى رەوەندى کوردى: چارەسەری کورد بۆ دۆخى ئێستا کۆنفرانسێکی نەتەوەییە بە بەشداری سەرجەم پارتەکان بۆ دیاریکردنی ستراتیژی هاوبەش

عوسمان بایدەمیر، لە سیمینارێکى ژورى رەوەندى بزوتنەوەى گۆڕاندا رایدەگەیەنێت؛ سەردەمی ئێستا بۆ میلەتی کورد جیاوازە و دەبێت چاوکراوەبێت بەرامبەر دوژمنەکانی، چارەسەری کورد بۆ دۆخى ئێستا کۆنفرانسێکی نەتەوەییە بە هاوکاری و بەشداری سەرجەم حیزبە کوردستانیەکانی چوارپارچەی کوردستان بۆ دیاریکردنی ستراتیژی هاوبەش.

ژورى رەوەندى کوردى بزوتنەوەی گۆڕان بە بەشدارى گۆڕانخوازان و  خەمخۆرانی دۆزی کوردى چوارپارچەی کوردستان لە دەرەوە و ناوەوەی کوردستان، سیمینارێکى لەبارەى یادی (١٠٠) ساڵەی پەیماننامەی لۆزان بە ناونیشانی (پەیمانی لۆزان و کاریگەری لەسەر کورد و رۆژھەڵاتی ناوەڕاست) بۆ عوسمان بایدەمیر  سیاسەتمەداری ناوداری باکوری کوردستان‌ لەویبناری زووم ڕێکخست.

لە سیمینارەکەدا؛ عوسمان بایدەمیر  باسێکى لەبارەى لایەنە ‌سیاسیی و مێژووییه‌که‌ی رێککەوتننامەى لۆزان و کاریگەری ئەو رێککەوتنە لەسەر کورد و رۆژهەڵاتی ناوەڕاست بەگشتی کرد و ئاماژەى بەوەکرد "لەو سەردەمەدا کورد دڵپاک و دڵساف بووە بۆیە دابەشکراوە، ئێستا سەردەمێکی جیاوازە و میلەتی کورد دەبێت چاوکراوەبێت لەبەرامبەر دوژمنەکانی".

بایدەمیر بەپێویستى زانى کورد باشور و رۆژئاوا دۆست و پشتیوانی یەکتربن و هه موو کوردێک پشتیوانیان بکات، هاوکات پێیوایە؛ چارەسەری کورد کۆنفرانسێکی نەتەوەییە بە هاوکاری و بەشداری سەرجەم حیزبە کوردستانیەکانی چوارپارچەی کوردستان بۆ دیاریکردنی ستراتیژی هاوبەش.

لاى خۆیانەوە بەشداربوان بە پرسیار و سەرنج و تێبینی  بەشداربوون و گفتوگۆیەکی کراوە ئەنجامدۆا و بیر و بۆچون لەبارەیانەوە ئاڵوگۆڕکران.

لۆزان مژارێکی نیشتمانی و نه‌ته‌وایه‌تی گرنگه‌، بۆیە ژورى رەوەندى کوردى درێژە بە زنجیرە سیمینارەکانى دەدات و هەفتانە کەسایەتیەکی کورد بانگهێشت دەکرێت بۆ گفتوگۆکردن لەسەر گۆشەیەکی پەیماننامەی لۆزان.