ئەندامێکى جڤاتى نیشتیمانى: گۆڕان بەرنامەى گشتگیرى هەبوە بۆ ناوخۆ و ناوچە کوردستانییەکانى دەرەوەى ئیدارەى هەرێم

ئەندامێکى جڤاتى نیشتیمانى رایدەگەیەنێت؛ گۆڕان بەرنامەى پتەو و گشتگیرى هەبوە بۆ چارەسەرى دۆخى ناوخۆ و ناوچە کوردستانییەکانى دەرەوەى ئیدارەى هەرێم، ئێستاش خاوەنى هەمان بەرنامە و روئیایە و کار بۆ سەرخستنیان دەکات لە چوارچێوەى کارى پێکەوەیی بەتایبەت بۆ ئەو پرسانەى رەهەندى نیشتیمانییان هەیە، بەڵام لایەنەکانى دەسەڵات گوێیان لەو پڕۆژە و بەرنامانە نەگرت، بۆیە دۆخەکە بەم ئاستەى ئیستا گەیشتوە.

رۆڤان سەروەت، ئەندامى جڤاتى نیشتیمان بزوتنەوەى گۆڕان، جەخت دەکاتەوە لەوەى کێشەکانی یەکێتی و پارتی و ناکۆکییەکانیان لەسەر دەسەڵات و دابەشکارى سامان و پۆست و کورسى بوە، بەڵام بزوتنەوەی گۆڕان لەسەرەتاى دروستبونیەوە کۆمەڵێک بەرنامەى هەبوە بۆ ئەو سێکتەرانەى کارى تێدا کردوە بەتایبەت ئەو بابەتانەى رەهەندى نیشتیمانییان هەیە لەگەڵ بەدەمەوەچونى داواکارى هاوڵاتیان و بەدامەزراوەییکردن و پەیوەندییەکان لەگەڵ بەغدا و ناوچە کێشە لەسەرەکان، "
ئەگەر لایەنە سیاسەکان پێشتر کاریان پێبکردایە رەنگە ئەم دۆخە وەک ئێستا نەبوایە بەڵام بەداخەوە گوێیان لێنەگرت و کاریان پێنەکرد بۆیە ئەنجامەکە بەم شێوەیە بوە، لەگەڵ ئەوەشدا ئێستاش گۆڕان خاوەنى بەرنامەکانى خۆیەتى و کار بۆ سەرخستنیان دەکات".

پەیوەست بە ململانێى لایەنە سیاسییەکان، ئەندامەکەى جڤاتى نیشتیمانى دەڵێت: ئاساییە لایەنە سیاسیەکان ململانێ و جیاوازییان هەبێت، بەڵام گرنگە ئەو ململانێیە لەپێناو خزمەتکردنى خەڵک و پڕۆژەى نەتەوەیی و دامەزراویی و بەهێزکردنى قەوارەى هەرێمى کوردستان بێت، وەک ئەوەى گۆڕان کە قوربانى داوە لەپێناویاندا، بەڵام لایەنەکانى دەسەڵات ململانێکانیان لەپێناو بەرژەوەندى خۆیاندایە نەک خەڵک و جارى وا هەیە لایەنە عێراقییەکان یان وڵاتانى دەرەوە دەکەوێتە نێوانیان".

سەبارەت بە چارەسەرى دۆخەکە، رۆڤان سەروەت جەخت دەکاتەوە لەوەى گۆڕان چەندین جار نەرمى نواندوە و هەوڵى داوە کۆکەرەوەى لایەنە سیاسییەکان بێت بە لەبەرچاوگرتنى مافەکانى گەلەکەمان نەک بەرژەوەندى تایبەت و حیزبى، بەتایبەت پرسى ناوچە کوردستانییە دابڕێنراوەکان کە خەڵکەکەى هێشتا باجى کوردبون دەدەن، "بۆیە پێویستە ستراتیژێکى نیشتیمانى هێزە سیاسییەکان کۆبکاتەوە کە بەرژەوەندى خاک و خەڵکى خۆمان تێیدا ئەولەویەت بێت".