باژێروانى کفرى گۆڕان: ئۆرگانەکان و میدیا و تیمەکانى گۆڕان لە حکومەتى خۆجێی و هەرێم پاڵپشتى گەیاندن و جێبەجێکردنى داوا رەواکانى خەڵکى کفرین
16/07/2023
باژێروانى مەکۆى کفرى بزوتنەوەى گۆڕان رایدەگەیەنێت؛
داواکاریی مانگرتوانى شارى کفرى بۆ هێنانى پڕۆژەى خزمەتگوزاریی و رەخساندنى هەلى
کار و بوژاندنەوەیە کە تائێستا حکومەت نەیکردوە لەکاتێکدا کفرى شارێکى سنورییە و
مەترسى لەسەرە، دەشڵێت: بزوتنەوەى گۆڕان وەک لایەنێکى سیاسى هاوکات تیمەکانى لە
حکومەتى خۆجێی گەرمیان و وەزیرەکانى لە حکومەت و میدیایەکەشى پاڵپشت و پشتیوانى
گەیاندنى داوا رەواکانى خەڵکن و لەگەڵیاندابون.
رۆڤان سەروەرت، باژێروانى مەکۆى کفرى بزوتنەوەى گۆڕان،
لەبارەى داواکارییەکانى خەڵکى کفرى کە شەش رۆژە نوێنەرەکانیان مانگرتنیان
راگەیاندوە بە سایتى (گۆڕان)ى راگەیاند: حکومەتى هەرێم ستراتیژێکى باشى نەبوە بۆ
گرنگیدان بە شارى کفرى و کێشە و داواکارییەکانى خەڵکیش کەڵەکەبون، چونکە ئێمە لە
ساڵى (2012)ەوە دەستمان بە جوڵە کردوە و داواکارییەکانمان بە یاداشت و دیدار
پێشکەشى لایەنە پەیوەندیدارەکانى حکومەت و پەرلەمانیش کردوە، بەڵام تەنها
بەڵێندراوە و تائیستا جێبەجێ نەکراون.
ئاماژە بەوەش دەکات؛ کفرى شارێکى سنورییە و مەترسى
لەسەرە و خزمەت و پڕۆژەش نییە بۆ خزمەتى شار و خەڵکەکەى، حکومەتى هەرێم ستراتیژێکى
باشى نەبوە، بۆیە دەبێت حکومەت گرنگى زۆرى پێبدات چونکە زەمینەى خزمەتیش هەیە
لەسەرجەم کەرتەکانى وەک نەوت، گەشتوگوزار، وەبەرهێنان و کەلتور و شوێنەوار،
بۆیە" داواکارى سەرەکى خەڵک هێنانى پڕۆژەى خزمەتگوزاریی و رەخساندنى هەلى کار
و بوژاندنەوەیە، ناڕەزایەتیەکانیش بەردەوامى هەیە تا ئەو کاتەى حکومەت دێتە سەر
خەت بۆ چارەسەرکردنیان".
لەبارەى هەڵوێستى بزوتنەوەى گۆڕان و تیمەکانیشیەوە،
رۆڤان سەروەت دەڵێت: بە واجبى ئەخلاقى خۆمانى دەزانین پشتیوانى و پاڵپشتى
داواکارییەکان بین، تەواوى ئۆرگانەکان و میدیاى گۆڕان لە خزمەتى گەیاندنى داوا
رەواکانى خەڵکى کفریدابوە، تیمى حکومەتى خۆجێیی گۆڕان لە گەرمیان سەردانى
مانگرتوانیان کردوە و وەزیرەکانیشى لە حکومەت بەڵێنیانداوە ئەوەى لە توانایاندا
بێت بۆ جێبەجێکردنى داواکارییەکان لەگەڵیاندا بن و پاڵپشتیان بن".