جڤاتى گشتى پشتیوانى بۆ بەڕێوەبەرى پۆلسى هاتوچۆ دوپات دەکاتەوە

جڤاتى گشتى بزوتنەوەى گۆڕان پشتیوانى بۆ بەڕێوەبەرى نوێى پۆلیسى هاتوچۆى سلێمانى دوپات دەکاتەوە لە پێناو جێبەجێکردنى ئەرکەکان بۆ خزمەتکردنى زیاترى هاوڵاتیان، بەڕیوەبەرى هاتوچۆش دەڵێت: لە ئەجێنداى کارى خۆم و کارەکەشدا هاوڵاتى سەنتەرە، ئەوەى لە ئەستۆى ئێمەیە ئەرکە بۆ خزمەت و پاراستنى ژیانى خەڵک و کەمکردنەوەى روداوەکان.

ئەمڕۆ دوشەممە (2023/8/7)، شاندێکى جڤاتى گشتى بزوتنەوەى گۆڕان بۆ پیرۆزبایی دەستبەکاربونى عەمید ئاسۆ محەمەد ئەمین، بەڕێوەبەرى نوێى پۆلیسى هاتوچۆى پارێزگاى سلێمانى سەردانیان کرد، لەو بارەیەوە ئەندامێکى جڤاتى گشتى رایگەیاند: بۆ پیرۆزبایی و پشتیوانى لە سەرخستنى کارەکانیان و خزمەتى زیاترى هاوڵاتیان و شۆفێران سەردانى عەمید ئاسۆمان کردوە و "هیوادارین بتوانێت لە چوارچێوەى ئامانج و بەرنامەى سیاسیى بزوتنەوەى گۆڕان کە بۆ خزمەتى خەڵک و شارەکە و تەواوى هاونیشتیمانە، خزمەت بکات و تواناکانى بەگەڕ بخات".
ئەوە لەکاتێکدایە پێشتریش ئاسۆ محەمەد ئەمین کە لە پشکى بزوتنەوەى گۆڕان ئەو پۆستەى وەرگرت، رایگەیاند: هیوادارم بتوانم خزمەتێکى زیاتر بە دانیشتوانى ئەم پارێزگایە و شۆفێران بکەین و سیستەمێکى باش پەیڕەو بکەین، "چونکە لە ئەجێنداى کارى خۆم و بەڕێوەبەرایەتیەکەشدا واى دەبینم هاوڵاتى سەنتەرە، ئەوەى لە ئەستۆى ئێمەیە ئەرکە بۆ خزمەتى خەڵک و کەمکردنەوەى روداوەکانى هاتوچۆ و پاراستنى ژیانى خەڵک و کەمکردنەوەى سەرپێچى، دەمانەوێت بەشێوەیەک مامەڵە بکەین سەر و ماڵى خەڵک سەلامەت بێت، ئامانجى سەرەکى من پاراستنى ژیانى هاوڵاتیانە بۆیە داوا دەکەم شۆفێرانیش پابەندى رێنماییەکانبن کە بۆ بەرژەوەندى و پاراستنى ئەوانە، چونکە بەداخەوە روداوەکانى هاتوچۆ قوربانى زۆرى لێکەوتوەتەوە ئەرکى هەمومانە کاربکەین و پابەند بین بۆئەوەى ئەو روداوانە کەم بکەینەوە".

فۆتۆ: بڕیار نامیق