ئەندامێکى جڤاتى نیشتیمانى گۆڕان: ئەوەى لە کەرکوک دەگوزەرێت ئەنجامى سیاسەتى هەڵە و ناکۆکى چەندساڵەى پارتى و یەکێتییە

ئەندامێکى جڤاتى نیشتیمانى بزوتنەوەى گۆڕان رایدەگەینێت؛ لە چەندساڵى رابردودا هیچ کات هێندەى ئێستا مەترسی لەسەر ھەرێمی کوردستان و ژیان و گوزەرانى خەڵک دروستنەبووە کە هۆکارەکەى خراپى حکومڕانى و هەڵەى سیاسەتى دو حیزبى دەسەڵاتدارە، ئێستاش لەم دۆخە خراپەدا پارتى و یەکێتى بەرژەوەندییە باڵاکانیان کردوە بە قوربانى شەڕی پاراستنی بەرژەوەندی کەسی و حزبی .

رۆڤان سەروەت ئەندامى جڤاتى نیشتیمانى بزوتنەوەى گۆڕان رایدەگەیەنێت؛ ھەرێمی کوردستان و  حوکمڕانیەکەی کە بەری ڕەنجی دەیان ساڵ لەخەبات و تێکۆشەکانی میللەتەکەمانە، بەهۆى ناتەبایی و ناکۆکى حزیبى و شەخسى یەکێتى و پارتییەوە لەبەردەم مەترسى گەورەدایە.

ئاماژە بەوەش دەکات؛ ژیان و گوزەرانى موچەخۆران و خەڵکى کوردستان بەهۆى سیاسەتى هەڵە و ململانێ و بەرژەوەندى حیزبی و شەخسى نێوان یەکێتی و پارتیی لەوپەڕى خراپیدایە، بۆیە بەرپرسیارێتى ئەو دو حیزبەیە کە لەبرى ناکۆکى داهات شەفاف بکەن و بگەڕێنەوە بۆ جێبەجێکردنى ئەو بەرنامە پرۆژانەى بزوتنەوەى گۆڕان بۆ بە دامەزراوەییکردن و بە نیشتیمانیکردنى دامەزراوەکان یەکخستنى هێزى پێشمەرگە و بەهێزکردنى پێگەى کورد خستویەتیەڕو.

هەروەک جەخت دەکاتەوە ئەوەى لە کەرکوک و ناوچە کێشەلەسەرەکان دەگوزەرێت ئەنجامى سیاسەتى هەڵە و ناکۆکى چەندساڵەى ئەو دو حیزبەیە کە بەرژەوەندییە حیزبى و شەخسیەکانى خۆیان خستووەتە پێش هەموو بەرژەوەندییە نیشتیمانى و نەتەوەییەکانەوە.