گوڵستان سەعید: خەڵکى کوردستان و موچەخۆران خراونەتە بەردەداشى نێوان حکومەتى هەرێم و حکومەتى عێراق

گوڵستان سەعید، رایدەگەیەێت؛ خەڵکى کوردستان و موچەخۆران خراونەتە بەردەداشى نێوان حکومەتى هەرێم و حکومەتى عێراق، لەکاتێکدا هەردو حکومەت بەرپرسیارن بەرامبەر خەڵکى کوردستان و موچەخۆران و پێویستە ئەو رێککەوتنانەى خۆیان کردویانە پابەندى بن و جێبەجێى بکەن نەک لەپێناو ململانێى سیاسى خۆیاندا خەڵک برسى بکەن.

گوڵستان سەعید، سەرۆکى فراکسیۆنى گۆڕان لە خولى پێنجەمى پەرلەمانى کوردستان لەبارەى دۆخى خراپى خەڵک و نەدانى موچەى موچەخۆرانى هەرێمى کوردستان رەخنە لە هەردو حکومەتى هەرێم و بەغدا دەگرێت و دەڵێت: بێ متمانەیی هەیە لەنێوان حکومەتى هەرێمى کوردستان و حکومەتى عێراق، خەڵکى کوردستان و موچەخۆران خراونەتە بەردەداشى نێوان حکومەتى هەرێم و حکومەتى عێراقهەردو حکومەت بەرپرسیارن بەرامبەر خەڵکى کوردستان و پێویستە ئەو رێککەوتنانەى خۆیان کردویانە هەردولا پابەندى بن و جێبەجێى بکەن، ناکرێ ململانێى سیاسى بکرێتە بەهانە بۆ برسیکردنى خەڵک.

هەروەک رەخنە لە سیاسەتى چەند ساڵى رابردوى حکومەتى هەرێم و ململانێى حیزبى و شەخسى نێوان پارتى و یەکێتى دەگرێت و دەڵێت: ئەوەى لەم هەرێمى کوردستانە بەرهەم هاتووە موڵکى هەموو خەڵکى کوردستانە و خەڵکى کوردستان قوربانی زۆریداوە بۆ قەوارەى هەرێمى کوردستان، نەک موڵکى یەکێتى و پارتى تا بەپێى بەرژەوەندییەکانى خۆیان مامەڵەى پێوە بکەن و بە ململانێى ناشرین و بەرژەوەندى خۆیان قوتى خەڵک ببڕن، پێویستە ئەو پارانەش کە بردویانە بیگەڕێننەوە بۆ خەزێنى ئەم وڵاتە.

ئاماژە بەوەش دەکات کە حکومەت لە رابردودا نەیتوانى وەک ئەوەى ئاماژەى بۆدەکرد و بەڵینى بە خەڵک دەدا ئابورى سەربەخۆ بخاتە خزمەتى هاوڵاتیانەوە، بەڵکو ئەو سیاسەتە هەڵانەى پەیڕەویان کردوە لەگەڵ نەبونى خزمەتگوزارییەکان و وەڵامنەدانەوەى داخوازییەکانى هاوڵاتیان وایکردوە بێ متمانەیی لەنێوان هاوڵاتیان و حکومەت دروستکردوە و بەداخەوە خەڵک کرایە قوربانیی و بێ ئومێدکرا.