ئەندامێکى جڤاتى نیشتیمانى گۆڕان: ململانێی حیزبی و ئه‌منی و خراپى ئیدارەدانى یه‌كێتی و پارتیەوە هه‌رێمی كوردستانى بەم قۆناغە گەیاند

ئه‌ندامێکی جڤاتی نیشتیمانی بزوتنه‌وه‌ی گۆڕان رایدەگەیەنێت؛ كێشه ‌و ململانێی حیزبی و سیاسی و ئه‌منی و خراپى ئیدارەدان لەلایەن یه‌كێتی و پارتیەوە وایكردوه‌ دۆخی هه‌رێمی كوردستان به‌و شێوه‌ لاوازبێت و خه‌ڵك دوای سێ مانگ چاوه‌ڕوانی موچه‌ بكات، بۆیە ئه‌گه‌ر ئه‌و ناكۆكی و ناته‌باییه‌ و دابه‌شبونە به‌رده‌وامبێت‌ و هەوڵى یەکڕیزى نەدرێت، به‌ دڵنیاییه‌وه‌ مه‌ترسییه‌كان زیاتر ده‌بن و له‌و كاته‌شدا هاوڵاتییان زه‌ره‌رمه‌ندی یه‌كه‌م ده‌بن.

رۆڤان سه‌روە‌ت، ئه‌ندامی جڤاتی نیشتیمانی بزوتنه‌وه‌ی گۆڕان، ئاماژە بەوە دەکات؛ له‌ سه‌ره‌تای دروستبونییه‌وه‌ بزوتنه‌وه‌ی گۆڕان به‌شێوه‌یه‌كی به‌رده‌وام خه‌می یه‌كڕیزی نیشتیمانی و نێوانى لایه‌نه‌ سیاسییه‌كانی له‌ ئه‌ستۆ گرتوه‌، له‌ پاكێجه‌كانی سه‌رده‌می ئۆپۆزسیۆن و دوای ئه‌وه‌ی به‌شداری له‌ پێكهێنانی حكومه‌تی هه‌رێمی كوردستانی كردوه‌، هه‌میشه‌ داوای یه‌كڕیزی نیشتیمانی و نه‌ته‌وه‌یی كردوه‌ به‌تایبه‌تی له‌دانوستانه‌كان له‌گه‌ڵ ده‌وڵه‌تی عێراقدا‌، پێش دو ساڵیش له‌ سۆنگه‌ی هه‌ستكردن به‌به‌رپرسیارێتی ده‌ستپێشخه‌ری کرد و سەردانى لایه‌نه‌ سیاسییه‌كانی كرد‌ و هۆشدارى دانێ له‌ مه‌ترسییه‌كانی سه‌ر هه‌رێم و په‌رله‌مان و دامه‌زراوه‌كان، بەڵام گوێیان نەگرت تا دۆخەکە بە ئێستا گەیشت و پەرلەمان و ئەنجومەنى پارێزگاکانیش هەڵوەشێنرانەوە.

هەروەک ئەوە دەخاتەڕو سەربارى هۆشدارییەکانى بزوتنەوەى گۆڕان، هاوپەیمانانیش بە بەردەوام داوایان کردوە ‌كورد یه‌كگوتار و خاوه‌نی یه‌ك هێزی پێشمه‌رگەى رێکخراو بێت، به‌ڵام یه‌كێتی و پارتی تا ئێستا جێبه‌جێیان نه‌كردوه‌، بۆیه‌ ده‌بینین،‌ ئەو پاڵپشتەى ئەوانیش وەک رابردو نییە.

ئه‌ندامەکەی جڤاتی نیشتیمانی بزوتنه‌وه‌ی گۆڕان ئاماژه‌ی بۆئه‌وه‌شكرد؛ ئه‌گه‌ر ئه‌و ناكۆكی و ناته‌باییه‌ و دابه‌شبون به‌سه‌ر جه‌مسه‌ره‌كاندا له‌ نێوان یه‌كێتی و پارتیدا به‌رده‌وامبێت‌، به‌ دڵنیاییه‌وه‌ مه‌ترسییه‌كان زیاتر ده‌بن و له‌و كاته‌شدا ته‌نها خه‌ڵكی هه‌رێمی كوردستان زه‌ره‌رمه‌‌ندی یه‌كه‌م ده‌بێت.