فەرمان مەجید: ستراتیژى گۆڕان داکۆکیکردن و بەدیهێنانى خواست و داواکارییەکانى خەڵکە

ئەندامێکى جڤاتى نیشتیمانى بزوتنەوەى گۆڕان رایدەگەیەنێت؛ بەلاوازبونى بزوتنەوەى گۆڕان دۆخى بەڕێوەبردن و خواستەکانى خەڵک و پرسە نیشتیمانییەکان دەکەوێتە بەردەم مەترسى و لە رابردودا ئەوەشمان بینى، بۆیە پێویستمان بە بەخۆداچونەوە و نوێبونەوە و خۆڕێکخستنەوە هەیە بەشێک لەو هەوڵانەش بەردەوامیدانە بە پڕۆسەى ئاشتەوایی و پێکەوە کارکردن لەگەڵ هەڵبژاردنى خانەى راپەڕاندن و بەستنى کۆنفڕانسى نیشتیمانى وەکئەوەى لە کۆتا کۆبونەوەیدا جڤاتى نیشتسمانى بڕیارى لێدا.

فەرمان مەجید، ئەندامى جڤاتى نیشتیمانى بزوتنەوەى گۆڕان رایدەگەیەنێت؛ لەماوەى رابردودا بزوتنەوەى گۆڕان لەرێگەى بەیاننامە و سەردانیکردنى لایەنە سیاسییەکان هۆشداریداوە لە ئاڵنگارى و پێشهاتە نوێیەکان و شێوازى حکومڕانى و پێویستى چارەسەرکردنى قەیرانەکان و بەدەمەوەچونى داخوازییەکانى هاوڵاتییان و موچەخۆران و مامۆستایان، پڕۆژەشى هەبوە، لە کۆبونەوەى دوێنێى جڤاتى نیشتیمانیشدا مەترسییەکان گفتوگۆى جدییان لەسەرکرا و بەپێویستزانرا کاربکرێ بۆ چارەسەرى کێشە سیاسى و دارایی و ئیدارییەکان لەگەڵ حکومەتى ئیتیحادى، چونکە دۆخى ناوچەکە رەنگدانەوەى دەبێت لەسەر هەرێمى کوردستان.

پەیوەست بە دۆخى ناوخۆیی و بڕیارى هەڵبژاردنى هەڵبژاردنى خانەى راپەڕاندن، ئەندامەکەى جڤاتى نیشتیمانى دەڵێت: ئەو پرسە جڤاتى نیشتیمانى بڕیاری لێدا و ئۆرگانە تایبەتمەندەکان راسپێردراون بەرمەبناى دەستورى ناوخۆیی گۆڕان ئامادەکارییەکان بکەن بۆ ئەنجامدانى هەڵبژاردنى خانەى راپەڕاندن و دەرگا لەبەردەم هەمو هەڵسوڕاواندا کراوە دەبێت، هاوکات لەگەڵ ئەوەدا پرۆسەى ئاشتەوایی لاى ئێمە کۆتایی نەهاتوە و پێویستمان بەو هاوڕێیانەمانە کە لەدەرەوەى پەیکەرەى رێکخراوەیین و بە ئەرکى هەمومانى دەبینین کە پێکەوە کاربکەین و لەپێناو داخوازییەکانى خەڵکدا، چونکە ستراتیژى بزوتنەوەى گۆڕان داکۆکیکردن و بەدیهێنانى  خواست و داواکارییەکانى خەڵکە.

جڤاتی نیشتمانی، دامه‌زراوه‌ی سه‌ركردایه‌تی  بواره‌كانی كاری سیاسی، رێكخراوه‌ی، كارگێری، دارایی و میدیایی بزوتنه‌وه‌ی گۆڕانه‌ و به‌رزترین ده‌سه‌ڵاته‌ له‌ نێوان دوو هه‌ڵبژاردندا،  خانه‌ی راپه‌راندنیش به‌رپرسی جێبه‌جێكردن و بریار و راسپارده‌كانی جڤاتی نیشتمانی بزوتنه‌وه‌ی گۆڕانه‌، له‌ نێوان دوو كۆبونه‌وه‌دا.