ئاستەنگەکانی پێدانی موچە لە سیمینارێکى ژورى رەوەندى کوردیدا

ژورى رەوەندى کوردى سیمینارێک لەبارەى ئاستەنگەکانی پێدانی موچە لە نێوان هه‌رێمی کوردستان و عێراقدا بۆ وتەبێژى وەزارەتى دارایی و ئابورى رێکخست و تێیدا جەختکرایەوە لە جێبەجێکردنى تەواوى هەنگاوەکانى چاکسازى و هەوڵدان بۆ پێدانى موچەى فەرمانبەران و مامۆستایان لە وادەى خۆیدا و بەدەستهێنانى شایستەداراییەکانى هەرێمى کوردستان.

له‌ درێژه‌ی ئه‌و زنجیره‌ سیمینارانه‌دا کە ژووری رەوەندی کورد سازی ده‌کات، ئێواره‌ی رۆژی شه‌ممه‌ (١٨/١١/٢٠٢٣) کۆڕێكی بۆ هونەر جەمال، وتەبێژی وەزارەتی دارایی و ئابوری حکومه‌تی هه‌رێمی کوردستان رێکخست و تێیدا تەواوى گرفت و کێشه‌کانی پێدانی موچه‌ له‌ کاتی خۆیدا به‌ موچه‌خۆرانی هه‌رێمی کوردستان خرایەڕو، جەخت لەوەش کرایەوە کە کێشه‌کە‌ که‌ڵه‌کەبوى ساڵانی پێشتره‌ لەگەڵ بونى کێشه‌ى ته‌کنیکی و یاسایی بەتایبەت دواى پەسەندکردنى بودجەى گشتى عێراق.

لە سیتمینارەکەدا تیشکخرایە سەر ئەو هەنگاو و رێکارانەى وەزارەتى دارایی وه‌زاره‌تی دارایی و ئابورى له‌م کابینه‌یه‌دا جێبه‌جێی کردوه‌ کە تا ڕاده‌یه‌کی باش به‌هه‌ده‌ردانی خه‌رجی کەمکردوەتەوە و توانراوە داهاته‌کانی خاڵه‌سنورییه‌کان بۆ خه‌زێنه‌ی وه‌زار‌ه‌ت بگەڕێنرێتەوە، هاوکات وتەبێژى وەزارەتى دارایی بەرچاوڕونى دا لەبارەى پڕۆژه‌ی (هه‌ژماری من) کرد، که‌ له‌ ئێستادا له‌ قۆناغی تاقیکردنه‌وه‌دایه‌ و بە کەوتنە بوارى جێبەجێکردنى پڕۆسەکە کێشه‌ی نه‌بوونی پاره‌ی نه‌ختینه‌ و کاش له‌ بانکه‌‌کاندا چاره‌سه‌ر ده‌کات.

دواتر ئامادەبوانى سیمینارەکە گفتوگۆى جدى و پێشنیاز و سەرنجەکانیان خستەڕو پەیوەست بە کۆى کاروبارەکان و پێویستى جێبەجێکردنى تەواوى هەنگاوەکانى چاکسازى و هەوڵدان بۆ پێدانى موچەى فەرمانبەران و مامۆستایان لە وادەى خۆیدا و بەدەستهێنانى شایستەداراییەکانى هەرێمى کوردستان لە بودجەى گشتى عێراق.