ئەنجومەنی قەزای کەلاری بزوتنەوەی گۆڕان هۆشداری دەدات

ئەنجومەنی قەزای کەلاری بزوتنەوەی گۆڕان هۆشداریی توند دەداتە حکومەتی خۆجێی شارەکە و دەڵێت؛ کارەبا لەسەر گیرفان و سامانی خەڵکی بەشمەینەتی گەرمیان بەرهەمدەهێنرێت و کۆمپانیا دەیفرۆشێت بە شوێنانی تر.

ئەنجومەنی قەزای کەلای بزوتنەوەی گۆڕان لە یاداشتێکدا کە ئاڕاستەی لایەنە حکومی و حیزبییەکانی گەرمیان و کەلاری کردوە هۆشداریی دەدات لە خراپبونی دۆخی کارەبای سنورەکە و دەڵێت: لە هەرێمی کوردستانەوە و لەڕێی گەرمیانەوە بڕی زیاتر لە 90 مێگاوات كارەبا دەدرێت بە ناوچەیەکی بچوکی دیالە و کارەبای ئەوێ فول بوە، كەچی هەمو گەرمیان نزیکەی 1150 میگاوات كارەبای بۆ دێت.


ئاماژەی بەوەشکردوە، لە ڕێگەی ئەم یاداشتنامەیەوە داواکارین لە ئیدارەی گەرمیان و قائمقامیەت و بەڕێوەبەرایەتی گشتی کارەبایی گەرمیان بەخێرایی بێنە دەنگ و چارەسەرێک بۆ ئەم کێشەیە بدۆزنەوە و بێدەنگی لێ نەکەن، جگە لەوەش داواکارین خەڵک و ڕۆشنبیران و کەسایەتیە کۆمەڵایەتی و سیاسیە دڵسۆزەکانی گەرمیان و شاری کەلار ئەم ناحەقی و ستەمکردن و پێشێلکردنی مافە قەبوڵ نەکەن ڕێگربن لەو زوڵمەی بەرانبەرهاونیشتمانیانی گەرمیان دەکرێت.
جەختیش دەکەنەوە لەوەی لە ئێستادا کارەبای 24 سەعاتی بۆ هەمو جێگایەک مافێکی بنەڕەتی سەرەتاییە و قابیلی موناقەشە نیە.



گەرمیان شایستەی خزمەتە نەک سزا سێکتەری کارەبا بەنمونە

یاداشتنامە ناڕەزایی
بەڕێز: ئیدارەی گەرمیان
بەڕێز : قائمقامیەتی قەزای کەلار.
بەڕێز:بەڕێوەبەرایەتی گشتی کارەبایی گەرمیان.
بەڕێز: لایەنە حزبیەکانی گەرمیان و کەلار.

 پێناسەی حکومەت واتا دەستبەرکردنی ژیانێکی شایستە و پاراستنی ماف و ژیانی خەڵک، بۆیە وەک لایەنێکی بەشدار لەحکومەتی خۆجێی گەرمیان نیگەرانی و ناڕەزایی هاوخەمی خۆمان دەردەبڕین سەبارەت بەو ڕوداوە دڵتەزێن و غەمگینانەی کە هاونیشتمانیانەی گەرمیان و کەلار ڕوبەڕوی دەبنەوە بەهۆی خراپ مامەڵەکردن لەگەڵ وزەی کارەبا لە دەڤەرەکەمان، بەداخەوە تادێت قوربانیانی ڕوداوی کارەبا لەشاری کەلار لەزیادبوندان و بەرپرسانی شاریش بێدەنگن و هیچ چارەیەکیان بۆ کەم کردنەوەی کارەبا نەگرتوەتەبەر.

بەداخەوە حکومەتی هەرێم و وەزارەتی کارەبا لەجیاتی موراعاتکردنی ژینگەی گەرمی گەرمیان لەوەرزی هاویندا، ماوەی چەند هەفتەیەک لەجیاتی باشکردن وپێدانی وەزەی کارەبایی زیاتر بە هاونیشتمانیانی گەرمیان لەوەرزی هاوینی گەرم و تاقەت پروکیندا، بەگوێرەی زانیاریەکانی چالاکوان ڕۆژنامەنوسان گەرمیان و کەلار لەئێستادا دۆخی کارەبا بەهۆی فرۆشتنی وەزەی کارەباوە بەپارێزگای دیاله لەڕێگەی هێڵەکانی کارەبای گەرمیانەوە دۆخی کارەبایی گەرمیان زۆر خراپ بوەو پێویستی بەچارەسەرو ئاوڕ لێدانەوەی ڕاستەقینەوەو دڵسۆزانە هەیە لەلایەن ئیدارەی گەرمیان و قائمقامیەت و بەڕێوەبەرایەتی گشتی کارەبایی گەرمیانەوە.

بەگوێرەی زانیاری و ئەوهەڵمەت و کەمپینەی چالاکوان و ڕۆژنامەنوسانی گەرمیان و کەلار ئاشکرایان کردوە ،گەر کارو فشاری هەمەلایەنەی کۆی لایەکان بەحیزبی و حکومیەوە لەسنوری ئیدارەی گەرمیان یەکنەخرێت ئەوا دۆخی خراپی کارەبا دەچێتەوە قۆناغێکی خراپەوە بەتایبەت لەمانگەکانی(تەمموز و ئاب) کە پلەکانی گەرمی لەگەرمیان بەشێوەیەکی نائاسایی بەرز دەبێتەوە، بۆیە وەک کارێکی ئەخلاقی و لایەنێکی سیاسی بەشدار لەحکومەتی خۆجێی گەرمیان هۆشیاری دەدەینە هەمو لایەنە حیزبی و حکومیەکانی سنوری گەرمیان کە بەدەنگ بێن و لەئاست ئەم ستەمکاریەی بەرامبەر دانیشتوانی گەرمیان و کەلار دەکرێت بەدەنگ بێن و قسەی خۆیان هەبێت، وا لەڕێگەی ئەم یاداشتنامەیە وێڕای هۆشیاری هەندێ زانیاری وردی ڕۆژنامەنوسان بۆڕای گشتی ئاشکرا دەکەین، هاونیشتمانیانی شکۆداری گەرمیان و شاری کەلاری خۆشەویست بەتایبەتی بۆ بەرچاو ڕۆشنی هەموان هۆکاری خراپبونی دۆخی کارەبایی نیشتمانی لەئێستادا بۆ ئەوە دەگەڕێتەوەکە


لە هەرێمی کوردستانەوە و لەڕێی گەرمیانەوە بڕی زیاتر لە ۹۰ مێگاوات كارەبا دەدرێت بە ناوچەیەکی بچوکی دیالە و کارەبای ئەوێ فول بوە، كەچی هەمو گەرمیان نزیکەی ١١٥ میگاوات كارەبای بۆ دێت.


کارەبا لەسەر گیرفان و سامانی خەڵکی بەشمەینەتی گەرمیان بەرهەمئەهێنرێت و کۆمپانیا ئەیفرۆشێت بە شوێنانی تر!!


بۆیە لەڕێگەی ئەم یاداشتنامە  داواکارین لە ئیدارەی گەرمیان و قائمقامیەت و بەڕێوەبەرایەتی گشتی کارەبایی گەرمیان بەخێرایی بێنە دەنگ و چارەسەرێک بۆ ئەم کێشەیە بدۆزنەوە و بێدەنگی لێ نەکەن ، وەلایەکی تریشەوە داواکارین خەڵک و ڕۆشنبیران و کەسایەتیە کۆمەڵایەتی و سیاسیە دڵسۆزەکانی گەرمیان و شاری کەلار ئەم ناحەقی و ستەمکردن و پێشێلکردنی مافە قەبوڵ نەکەن ڕێگربن لەو زوڵمەی بەرانبەرهاونیشتمانیانی گەرمیان دەکرێت، بەداخەوە تا ئێستا بەرپرسانی ناوچەكە بێ دەنگن و بە بیانوی ئەوەی فەرمان لە سەروی خۆیانەوە هاتوە هیچ هەڵوێستێكیان نیە.


هەڵبەت لە ئێستادا کارەبای بیستوچوارسەعاتی بۆ هەمو جێگایەک مافێکی بنەڕەتی سەرەتاییە و قابیلی موناقەشە نیە!

بزوتنەوەی گۆڕان
ئەنجومەنی قەزای کەلار
30حوزەیرانی 2024