ژورى سەرچاوە مرۆییەکان خەڵات دەبەخشێتە خوێندکارێکى یەکەمى هەرێمى کوردستان

ئەمڕۆ یەکشەممە (١ى٩ى٢٠٢٤)، ژورى سەرچاوە مرۆییەکانى بزوتنەوەى گۆڕان بە ئامادەبونى ژمارەیەک لە نوێنەرى ژور و ئۆرگانەکانى بزوتنەوەى گۆڕان خەڵاتى رێزلێنانى بەخشیە (ئەژى دارا جەلال) یەکەمى هەرێمى کوردستان لەسەر ئاستى بەشى زانستى بۆ قۆناغى 12ى ئامادەیی.

دلێر عەبدولخالق وتەبێژى بزوتنەوەى گۆڕان لە وتەیەکدا لەگەڵ نرخاندنى رەنج و ماندوبون و بەدەستهێنانى بەرزترین نمرە لەلایەن ئەو خوێندکارەوە وتى: بزوتنەوەى گۆڕان یەکێک لە ئامانجەکانى گەشەپێدان بوە بە تواناسازى مرۆیی لە هەرێمى کوردستان تا هاوڵاتى و گەنجى کورد لە لەروى زانست و فێرکردنەوە گەشە بە توانا و بەهرەکانیان بدەن، لێرەوە دوبارە
پیرۆزبایی گەرم لە تەواوى خوێندکاران و خانەوادەکانیان و کەسوکاریان دەکەین و ڕۆڵی مامۆستاکانیان لەسەرخستنیان بەرزدەنرخێنین، ئومێدى سەرکەوتن و چنینەوەى رەنجى چەند ساڵەیان بۆدەخوازین، بزوتنەوەى گۆڕان بە گرنگییەوە لە پڕۆسەى پەروەردە دەڕوانێت و جەخت لە رەخساندنى هەلى گونجاو و پڕۆسەیەکى تەندروست بۆ کەرتى پەروەردە دەکاتەوە لەپێناو ئایندەیەکى باشتر بۆ نەوەکانمان و داهاتویەکى گەشتر بۆ هەرێمەکەمان".

لاى حۆیەوە گۆڕان نەوزاد ئەندامى ژورى سەرچاوە مرۆییەکانى بزوتنەوەى گۆڕان ئاماژەى بەوە کرد؛ کاک ئەژى و خانەوادەکەى یەکێک بون لە سەرچاوە مرۆییە بەهێزەکانى گۆڕان و خزمەتى پڕۆژە و بەرنامەى سیاسى بزوتنەوەى گۆڕانیان کردوە، کە توانیویشەیەتى لە پێشەنگەکان و یەکەمى سەر ئاستى هەرێمى کوردستان بێت پێمان خۆشبو خەڵاتى بکەین و هیواى سەرکەوتوویی بۆ کاک ئەژى و تەواوى خوێندکارانى هەرێمى کوردستان دوپات دەکەینەوە.

هاوکات ئەژى دارا، وتى: بە شانازییەوە ئەم خەڵاتەم پێبەخشراوە لەپاى ماندوبونى خوێندنم و بەدەستهێنانى نمرەیەکى بەرز، بۆیە ئەم خەڵات و رێزلێنانە بەرز دەنرخێنم و سوپاسى پاڵپشتى و ئەو هاندانە دەکەم، کاریگەریشى دەبێت لەسەر ئایندە و کارکردنم بۆ خزمەتى کۆمەڵگە.