وەفدێکى ژورى رەوەندى کوردى سەردانى مەکۆى شارەزور دەکات

وەفدێکى ژورى رەوەندى کوردى بزوتنەوەى گۆڕان، بۆ پتەوکردنى پەیوەندییەکان و هەماهەنگى زیاتر و کارى پێکەوەیی بە ئامانجى بەهێزکردنەوەى بزوتنەوەى گۆڕان و بەرەى خەڵک، سەردانى مەکۆى شارەزور دەکات و لەگەڵ باژێروان و دەستەى ئەنجومەنى قەزا کۆدەبێتەوە.

لەسەردانى وەفدەکەدا کە پێكهاتبون لە فوئاد جەمال سەلام  رێكخەری ژووری ڕەوەندی كوردی، پەری ئەحمەد نوێنەری ئافرەتانی ئەوروپا لە جڤاتی نیشتمانی و ئاسۆ حەسەن بازنەوانی شاری كۆڵن لە ئەڵمانیا و ڕۆز دڵشاد بەرپرسی پەیوەندیە سیاسیەكانی ئەنجومەنی فینلاند، بەهادین عەلی سكرتێری بازنەی گڵاسگۆ لە بەریتانیا و فریاد جەمال  هەڵسوڕاوی  گۆڕان لە وڵاتی بەریتانیا، گفتوگۆ لەبارەى دۆخى سیاسى و پێشهاتە نوێیەکان و دۆخى رەوەندى کوردى کرا.

لە دیدارێکدا کە باژێروان و بەشێک لە ئەندامانى ئەنجومەنى دەستەى قەزا و هەڵسوڕاوان بەشداربون، گفتوگۆ دۆخى ناوخۆیی و چۆنیەتى پتەوکردنى پەیوەندییەکان و کارى پێکەوەیی و هەنگاوەکانى بزوتنەوەى گۆڕان بەتایبەت تەواوکردنى پڕۆسەى هەڵبژاردنە ناوخۆییەکان کرا بە ئامانجى ئامادەكاریی بۆ قۆناغی نوێ و روبەڕوبونەوى ئاڵنگارییەکان و یەکخستنى هەوڵەکان بۆ بەهێزکردنەوەى بزوتنەوەى گۆڕان و بەرەى خەڵک.
دواتر وەفدى رەوەندى کوردى بە یاوەرى شاخەوان رەئوف بەگ سەردانى گلكۆی شەهیدی دورە وڵات سەردار نەمەڵیان كرد و وەفا و بەڵێنى بەردەوامییان لەسەر بەرنامەى سیاسى گۆڕان دوپاتکردەوە.