نوێنەری بزوتنەوەی گۆڕان لە كۆبونەوەی برۆكسل: رۆژئاوای كوردستان پێویستی بە یەكڕیزی و كۆدەنگی لایەنە كوردییەكان هەیە

نوێنەری بزوتنەوەی گۆڕان لە كۆبونەوەی پارت و لایەنە کوردستانییەکان لە برۆكسل پەیوەست بە دۆخی رۆژئاوا جەخت لە هەڵوێستی نیشتمانی بزوتنەوەی گۆڕان دەكاتەوە و یەكڕیزی و كۆدەنگی لایەنە كوردییەكانی رۆژئاوا و پشتیوانی حكومەت و لایەنە سیاسییەكانی باشوریش بۆ رۆژئاوا بەپێویست دەزانێت.

لە بارەگای نوێنەرایەتیی خۆسەری رۆژئاوای کوردستان لە بڕۆکسل کۆبوونەوەی پارت و لایەنە کوردستانییەکان بۆ تاوتوێکردنی دۆخی رۆژئاوای کوردستان و سوریا بەڕێوەچو، تێیدا بۆچون و گفتوگۆ لەبارەی دوایین گۆڕانكاری و پێشهاتەكان گفتوگۆكرا.

لای خۆیەوە هەوراز جەمال رەفعەت كە بە نوێنەرایەتی بزوتنەوەی گۆڕان بەشداری كۆبونەوەكەی كرد جەختی لە روانگەی نیشتمانی بزوتنەوەی گۆڕان كردەوە پەیوەست بە دۆزی رەوای گەلی كورد و پەیوەست بە دۆخی سوریا و ئەو گۆڕانكاریانەی هاتونەتە ئاراوە بەتایبەت دوای روخانی رژێمی ئەو وڵاتە، دوپاتی كردەوە كە ئاڵنگاریەكان لە سوریا پێویستی بە كۆدەنگی و یەكدەنگی هەموو لایەنە كوردیەكانی رۆژئاوای كوردستان هەیە و پێویستە هەرێمی كوردستان و لایەنە سیاسییەكانی باشوری كوردستانیش پشتیوانی سیاسی و مەعنەوی رۆژئاوای كوردستان بكەن بۆئەوەی پێگەی كورد لە سوریای نوێ دیار بێت و ماف و داواكاری و خواستەكان كوردی رۆژئاوای كوردستان كە ساڵانێكە زەتكراوە، بەدی بێت.