ژووری ڕەوەندی کوردی دۆخی سیاسی و ناوخۆیی لەگەڵ گۆشەی بەریتانیا تاوتوێ دەكات

ژووری ڕەوەندی کوردی بزوتنەوەی گۆڕان دۆخی سیاسی و ناوخۆیی و پێشهات و ئاڵنگارییەكان لەگەڵ نوێنەرانی گۆشەی بەریتانیا تاوتوێ دەكات.

فوئاد جەمال رێكخەری ژووری ڕەوەندی کوردی بزوتنەوەی گۆڕان لە كۆبوونەوەكەدا كە ڕێگای وێبناری زووم بەڕێوەچوو، چەند پرسێكی ناوخۆیی و دۆخی سیاسی هەرێمی كوردستان و عێراق و رەوەندی كوردی و بزوتنەوەی گۆڕان خستەڕوو.

بەرپرسی  پەیجوری رەوەندی كوردی بزوتنەوەی گۆڕان ئاماژە بەوە دەكات؛ لە كۆبونەوەی گۆشەی بەریتانیا، گفتوگۆ كرا لەبارەی دۆخی سیاسی و پێشهات و ئاڵنگارییەكان و دۆخی ناوچەكە و كۆبونەوە و دیدار و بەشداری كارای رەوەندی كوردی لە چالاكییە سیاسی و رێكخراوەیی و رۆشنبیرییەكان لە وڵاتانی دەرەوە كە تێیاندا روانگەی بزوتنەوەی گۆڕان پەیوەست بە دۆزی كورد و یەكدەنگی لە پرسە نەتەوەیی و نیشتمانییەكان جەختی لێكراوەتەوە و هەمو هەوڵەكانیش بە ئامانجی بەدیهێنانی پشتیوانی زیاترە بۆ دۆزی گەلی كورد.

ئامادەبوانی کۆبونەوەکە جەختیانكردەوە كە تەواوی هەوڵ و تواناکانی خۆیان دەخەنەگەڕ بۆ سەرلەنوێ بەهێزکردنەوەی ئۆرگانەکانی بزوتنەوەی گۆڕان و پاراستنی تەبایی و یەکڕیزی ناوخۆیی هەڵسوڕاوان.