ژووری ڕەوەندی کوردی لە هەشتەمین ساڵیادی كۆچی دوایی رەوانشاد نەوشیروان مستەفا سیمینارێك رێكدەخات

ژووری ڕەوەندی کوردی بزوتنەوەی گۆڕان لە هەشتەم ساڵیادی کۆچی دوایی رەوانشاد نەوشیروان مستەفا، لەڕیگای وێبناری زوومەوە بە بەشداری ژمارەیەك لە هەڵسوڕاوان سیمینارێکی بۆ (د. چیا عەباس) روناكبیر و دۆستێکی  نزیکی ڕەوانشاد رێكخست بە ناوی (ئاوڕدانەوەک لەیادەوەریەکان لەگەڵ خۆرە بزێوەکەی کوردستان).

سیمینارەکە بە بەشداریی ژمارەیەکی بەرچاو لە کەسایەتی سیاسی و ڕۆشنبیر و ئەندامانی ڕەوەندی کوردی و لەلایەن شۆخان فازیل لە وڵاتی فینداوە بەڕێوەبرا و سەرەتا بە پارچە پەخشانێکی د. چیا عەباس دەستیپێکرد و دواتر باسی لە ڕۆڵی گرنگی کاک نەوشیروان مستەفا لە بزووتنەوەی سیاسی و رزگارخواز و گۆڕانخوازی کوردستان کرد و وتی: "هەشت ساڵ تێپەڕی بەسەر کۆچی دوایی ئەو ڕێبەرە گەورەیەدا، بەڵام هزر و بیرۆکەکانی هێشتا زیندوون و ڕێگای چاکسازی و دیموکراسی ڕووناک دەکەنەوە."

دواتر چەندین کەسایەتی ناسراوی ڕەوەندی کوردی وتەی تایبەت بە ژیان و خەباتی کاک نەوشیروان مستەفایان پێشکەش کرد و لە سیمینارەکەدا چەندین لاپەڕەی ژیان و خەباتی سیاسی رەوانشاد نەوشیروان مستەفا گفتوگۆكرا و وێستگە گرنگەکانی ژیانی سیاسی و بەرهەمە فکرییەکانی خرانەڕوو.

هاوكات لە چوارچێوەی سیمینارەکەدا، (خەباتی نەوشیروان مستەفا، بیرمەندی چاکسازی) بەرز هەڵسەنگێنرا و لای خۆیەوە فوئاد جەمال ڕێکخەری ژووری ڕەوەندی کوردی لە کۆتایی سیمینارەکەدا وتی: لێرە کۆبووینەتەوە نەک تەنها بۆ یادکردنەوەی کەسایەتییەکی گەورە، بەڵکو بۆ بەردەوامبوون لەسەر ڕێبازەکەی کە ڕێبازی چاکسازی و دیموکراسی و خزمەتی گەلە، ئێمە وەک ژووری ڕەوەندی کوردی بەڵێن دەدەین کە هەوڵ بدەین بیر و ڕێبازی کاک نەوشیروان زیندوو ڕابگرین."