وتاری پێشمەرگە دێرینەکان لە دیداری گۆڕانخوازان

دەقی وتاری پێشمەرگە دێرینەکان:

ئامادەبوانی بەرێز ..
پێشمەرگە دێرینەکان، کەمئەندامانی سەنگەر و هێزەکانی پێشمەرگە و ئاسایش و پاراستنی هەرێمی کوردستان..

خۆشحاڵین لەم دیدارە گرنگەدا، وەك ڕایەڵەی پێشمەرگە دێرینەكانی بزووتنەوەی گۆڕان، بواری ئەوەمان هەیە لەگەڵ ئێوە بدوێین و باری سەرنجمان بۆ پشتیوانی بزوتنەوەکە و ڕێکخستنەوەی قۆناغی ڕاگوزەر بخەینەڕوو.

هەموان ئەو ڕاستیە دەزانین بزووتنەوەی گۆڕان لەهەلومەرج و دۆخێكدا دروستبوو، كە دەسەڵات حوکمڕانیان لێوان لێوكردبوو لە گەندەڵی و ناعەدالەتی و پێشلكارە یاسایەكان، لەو کاتەوە تائێستا دۆخی سیاسیی هەرێمی کوردستان پێویستی بە گۆڕان و چاکسازی ڕیشەیی و بەنیشتیمانیكردنی ھێزەکانی پێشمەرگە و ئاسایش و پۆلیس و بوارەکانی تری حوکمڕانی ماوە.

لە ساڵی (٢٠٠٩)دا، دەرکەوتنی گۆڕان، جارێکی تر هیوای بۆ خەڵكی كوردستان و ئازادیخوازان گەڕاندەوە، لەو نێوەندەشدا بێگومان جگەلە پشتیوانی هەموو چین و توێژەکان، ژمارەیەکی زۆر لە فەرماندە و پێشمەرگە دێرینەكان و کەسایەتیە سەربازییەکان پشتیوانی سەرەكی سەرخستنی بزووتنەوەی گۆڕان بوون، هەربۆیە جێی خۆیەتی لەم دیدارەدا سڵاو بۆ خۆڕاگری هەموو ڕێکخستن و پێشمەرگەی دێرین و هەموو ئەو هاوڕێ بەڕێزانە بنێرین کە لە سێکتەرە ئەمنی و سەربازیەکانەوە پشتیوانیان کردین و لەسەر ئەو هەڵوێستە بەرزەشیان بە سەدانیان دووچاری سزادان و نابڕین و موچەبڕین بوونەوە.

لەم قۆناغە نوێیەشدا، بزووتنەوەی گۆڕان بە ڕێبەرایەتی بەرێز (دانا ئەحمەد مەجید) بەهەوڵ و هیمەتی سەرجەم هەڵسوڕا و دامەزراوە و ئۆرگانەكانی دیکە، دەمانەوێت خۆمان ڕێکبخەینەوە و وەکچۆن لە ژیانی پێشمەرگەیەتیدا بەسەر دەیان شکست و کۆسپی ژیان سەرکەوتین، ئێستا بەسەر ئاڵنگارییەکانی سەر بزوتنەوەکە زاڵ بین و  جارێكی دیکە متمانەی خەڵك و هاونیشتمانیان بۆ گۆڕان بە دەستبهێنینەوە، بە جۆرێک نەک لەمپەرەکان تێپەڕێنین، بەڵکو بە ڕوانگە نەتەوەیی و نیشتمانیەکانمانەوە بزوتنەوەی گۆڕان ببێتە هۆکاری خێر بۆ نزیکبوونەوەی ئاڕاستە جیاوازەکانی سیاسەتکردن لەناوخۆی هەرێمدا.

هاوڕێیانی بەشدار لە دیداری گۆڕانخوازان..
لەم کاتەدا، بە پێویستشی دەزانین هاوتەرین بەو دۆخە ئاڵۆزەی لە ڕۆژهەڵاتی ناوەڕاست و ئەگەرەکانی شەڕ لەناوچەکە و عێراق و کاریگەری ئەم دۆخە لەسەر هەرێم؛ دوبارە جەخت لەسەر پاکێجەکانی بزوتنەوەی گۆڕان بۆ چاکسازی و ڕێکخستنەوە و بە نیشتمانیکردنی هێزەکانی پێشمەرگە و زێرەڤانی و پۆلیس و ئاسایش و هێزە چەکدارەکان بکەینەوە. داواش دەکەین پێشمەرگە و ئاسایش و هێزەکانی پۆلیس لەژێر فەرمانی دامەزراوە فەرمیەکان و وەزارەتەکانی پێشمەرگە و ناوخۆ بن و دور بخرێنەوە لە تەدەخولی حیزبی و کەسی، بەشێوەیەک بە گیانی بەرزی خۆشەویستی نیشتمان پەروەردە بکرێن و ڕابهێندرێن و ئامادە بکرێن بۆ پاراستنی خاک و سەروەرییەکانی کوردستان.

لەكۆتاییدا، ماوە وەك ڕایەڵەی پێشمەرگە دێرنەكانی بزووتنەوەی گۆڕان بەڵێن بە ئێوەی بەڕێز و تەواوی گۆرانخوازان دەدەین، كە بە هەموو هێز و توانامانەوە  پشتیوانی خۆرێكخستنەوە و بەهیزكردنەوەی بزووتنەوەكەمان بین .

ڕایەڵەی پێشمەرگە دێرینەکان
٢٠-٩-٢٠٢٥