هۆڵەندا؛ بەبەشداری بزوتنەوەی گۆڕان پشتیوانی بۆ ڕۆژئاوا دووپاتكرایەوە

لە شاری ئەمستردامی پایتەختی وڵاتی هۆڵندا، بزووتنەوەی گۆڕان بەشداری لە خۆپیشاندانێکی جەماوەریدا کرد بۆ پشتگیریکردن لە ڕۆژئاوای کوردستان و مەحکومکردنی ئەو هێرشانەی دەکرێنە سەر گەڕەکە کوردنشینەکانی شاری حەلەب.
لەو خۆپیشاندانەی بەڕێوەچوو، هەوراز بابەجان، بەرپرسی گۆشەی ناوەندی ئەوروپا و ژمارەیەک لە هەڵسوڕاوانی بزووتنەوەی گۆڕان بەشدارییەکی کارایان تێدا کرد. ئامادەبووان بە توندی ئەو پەلامارانەیان سەرکۆنە کرد کە دەکرێنە سەر گەڕەکەکانی (شێخ مەقسوود و ئەشرەفیە) لە شاری حەلەب و هۆشدارییان لەبارەی مەترسیی جینۆسیاید دژی کوردانی ئەو ناوچانە دا.
خۆپیشاندەران لە ڕێگەی ئەم چالاکییەوە چەند داواکارییەکی ئاراستەی کۆمەڵگەی نێودەوڵەتی کرد، لەوانە:
•       نەتەوە یەکگرتووەکان و ڕێکخراوەکانی مافی مرۆڤ: داواکرا ڕای گشتی ئەوروپا و ناوەندە جیهانییەکان بێدەنگ نەبن لە ئاست ئەو تاوانانەی داروودەستەکەی ئەحمەد شەرع بەرامبەر بە کوردانی حەلەب و ڕۆژئاوا ئەنجامی دەدەن.
•       ڕاگرتنی شەڕ: داواکرا دەستبەجێ ئۆپەراسیۆنە سەربازییەکان بۆ سەر گەڕەکە کوردییەکان ڕابگیرێن و پرسی کورد بە شێوازێکی مەدەنی و لە ڕێگەی مێزی گفتوگۆوە چارەسەر بکرێت.
•       پشتیوانی ڕەوەندی کوردی: جەخت لەوە کرایەوە کە پێویستە کوردانی تاراوگە لەم کاتە هەستیارەدا پشتیوانێکی بەهێزی خوشک و براکانیان بن لە هەر چوار پارچەی کوردستان، بەتایبەت لە ڕۆژئاوا و ڕۆژهەڵاتی نیشتمان.
ئەم خۆپیشاندانە لە چوارچێوەی هەوڵە بەردەوامەکانی ڕەوەندی کوردی و هێزە سیاسییەکاندایە بۆ گەیاندنی دەنگی مەزڵومیەتی گەلی کورد بە پەرلەمان و حکومەتە ئەوروپییەکان.