بەشداری وەفدێکی بزوتنەوەی گۆڕان لە نۆیەمین شەوی گالای SME4Labour لە لەندەن

لە شەوی دووشەممە، ٢٢ی حوزەیرانی ٢٠٢٦، وەفدێک لە بزوتنەوەی گۆڕان بەشداری نۆیەمین شەوی گالای SME4Labourیان کرد، کە لە هۆتێلی London Marriott Hotel Grosvenor Square لە لەندەن بەڕێوە چوو و ژمارەیەکی زۆر لە خاوەنکاران، نوێنەرانی یەکێتییە کرێکارییەکان، کەسایەتییە سیاسییەکان، ئەندامانی پەرلەمان و بڕیاربەدەستانی بریتانی بەشدارییان تێدا کرد.

وەفدی بزوتنەوەی گۆڕان لەم بۆنەیەدا لەگەڵ چەندین کەسایەتیی سیاسی و بازرگانی ناسراو کۆبوونەوە و گفتوگۆیان لەسەر بابەتە هاوبەشەکان و گرنگی بەهێزکردنی پەیوەندییەکان و هاوکارییە نێودەوڵەتییەکان کرد.

بۆنەكە بە ئامادەکاری و سەرپەرشتی ئیبراهیم دۆگۆس، ئەندامی ئەنجومەنی شارەوانی لامبێث و کەسایەتییەکی ناسراوی کوردی باکوور، بەڕێوە چوو كە توانیویەتی لە ماوەی ئەم ساڵانەدا بە هەوڵ و چاڵاکییەکانی، سەدان کەسایەتیی سیاسی، ئابووری و کۆمەڵایەتی لە دەوری خۆی کۆ بکاتەوە و SME4Labour بکاتە یەکێک لە گرنگترین پلاتفۆرمەکانی گفتوگۆ و پەیوەندی نێوان جیهانی بازرگانی و بڕیاربەدەستانی سیاسی لە شانشینی یەکگرتوو.

لە ماوەی بەرنامەکەدا، میوانان بەشداری خوانی فەرمی گالا و خەڵاتەکانی SME4Labour Excellence Awardsیان کرد، کە تێیدا ڕێزلێنان لە کەسایەتی و دامەزراوەکان کرا کە ڕۆڵێکی کاریگەریان لە پەرەپێدانی بازرگانییە بچووک و ناوەندەکان و پشتگیری لە بەهاکانی دادپەروەری، دەرفەت و بەرپرسیاریی کۆمەڵایەتی هەبووە.

بەشداری وەفدی بزوتنەوەی گۆڕان لەم ڕووداوەدا هەنگاوێکی گرنگ بوو بۆ فراوانکردنی پەیوەندییەکان و ناساندنی زیاتر لەگەڵ کەسایەتی و لایەنە جیاوازەکان، هەروەها بەشێک بوو لە هەوڵەکان بۆ بەهێزکردنی دیالۆگ و هاوکاری لە ئاستی نێودەوڵەتی.

SME4Labour مەکۆیەکی سیاسی و تۆڕێکی بازرگانییە کە بنکەکەی لە بەریتانیادایە وەک پردێک لە نێوان کۆمپانیا بچووک و مامناوەندەکان (SMEs) و پارتی کرێکارانی بەریتانیا کاردەکات.