نوێنەری گۆڕان: هەماهەنگیی و كاری پێكەوەیی، پێداویستییەكانی ئەم قۆناغە بۆ سودی گەلەكەمان

بە مەبەستی یادکردنەوەی هەشتاهەمین ساڵی دامەزراندنی پارتی دیموکراتی کوردستان، ڕێوڕەسمێکی تایبەت لە شاری ئۆربرۆی سوید بەبەشداری نوێنەری لایەنە سیاسیەكان بەڕێوەچوو، تێیدا سەید قەهار زاخۆیی، ئەندامی جڤاتی ڕاوێژکاری بزوتنەوەی گۆڕان و نوێنەری بزوتنەوەی گۆڕان، بەشداری کرد و بە ناوی بزوتنەوەی گۆڕان پەیامی پیرۆزبایی  پێشکەش کرد.
نوێنەری بزوتنەوەی گۆڕان گرنگیی یەکڕیزی و هاوکاریی نێوان هێزە سیاسییەکان و پەرەپێدانی کەلتووری گفتوگۆ و دیالۆگی سیاسی خستەڕوو. جەختی لەسەر ئەوە کردەوە کە لە قۆناغی ئێستادا، نزیکبوونەوە و هەماهەنگیی نێوان لایەنە سیاسییەکان دەتوانێت ڕۆڵێکی کاریگەر لە بەهێزکردنی پرۆسەی سیاسی و چارەسەرکردنی کێشەکان بە شێوەیەکی ئاشتیخوازانە و لە ڕێگەی گفتوگۆوە هەبێت.
هەروەها ئاماژەی بەوە کرا کە دروستکردنی ڕوحی هاوبەشی، بەرەوپێشبردنی هەماهەنگی و بەهێزکردنی پەیوەندییە سیاسییەکان، یەکێکە لە پێداویستییە سەرەکییەکانی ئەم قۆناغە بۆ پاراستنی بەرژەوەندییە گشتییەکانی گەل و بەهێزکردنی بنەماکانی پرۆسەی سیاسی.
لە کۆتاییدا، بزوتنەوەی گۆڕان هیوای خواست کە پەیوەندی و هاوکاریی نێوان هێزە سیاسییەکان زیاتر پەرەی پێ بدرێت و بە دیالۆگ و هاوکاریی هاوبەش، هەنگاوی زیاتر بۆ چارەسەرکردنی ئاڵۆزییەکان و گەیشتن بە ئامانجە هاوبەشەکانی گەل هەڵبگیرێت.