دوایین زانیارى لەبارەى هەڵبژاردنى خانەى راپەڕاندنى بزوتنەوەى گۆڕانەوە

دوایین ئامادەکارییەکان بۆ بەڕێوەچونى پرۆسەى هەڵبژاردنە ناوخۆییەکانى بزوتنەوەى گۆڕان ئەنجامدراون و لەو چوارچێوەیەدا سبەینێ دەستەی سەرۆكایەتی جڤاتی گشتی هەڵدەبژێردرێت و رۆژی شەممەش ئەندامانی خانەی راپەڕاندن و رێكخەری گشتی هەڵدەبژێردرێن.

ئەمڕۆ چوارشەممە پەیامنێرى (سبەى) رایگەیاند؛ ئامادەكارییەكانی بزوتنەوەی گۆڕان بۆ هەڵبژاردنە ناوخۆییەكان بەردەوامی هەیە و لە دوێنێ سێشەممەوە فۆڕمی كاندیدەكانی دەستەی سەرۆكایەتی جڤاتی گشتی ئاڕاستەی ژوری یاسای كراون بەمەبەستی راستاندن و پەسەندکردنیان بەپێی مەرج و رێنماییەكان.

هەروەک بڕیارە سبەینێ پێنجشەممە، جڤاتی گشتی بزوتنەوەی گۆڕان كۆببێتەوە و دەستەی سەرۆكایەتی نوێ هەڵبژێرێت.

لاى خۆیەوە یاسین حەمەعەلى، ئەندامى ژورى هەڵبژاردنى بزوتنەوەى گۆڕان بە (سبەی) راگەیاند؛ سبەینێ پێنجشەممە وادەى خۆپاڵاوتن بۆ كاندیدانی رێكخەری گشتی و ئەندامانی خانەی راپەڕندن دادەخرێت و دوای ناردنی فۆڕمی كاندیدەكان بۆ ژوری یاسایی بەمەبەستی راستاندن، سەعات (10)ی بەیانی رۆژی شەممەی داهاتو (14/9/2019) هەڵبژاردنى ئەندامانی خانەی راپەڕاندن و رێكخەری گشتی بەڕێوەدەچێت.

وتیشى: "هەڵبژاردنە ناوخۆییەكانی بزوتنەوەی گۆڕان لەلایەن لیژنەیەكەوە سەرپەرشتی دەكرێت كە دادوەرێك سەرۆكایەتی دەكات و دو ئەندامی ژوری یاسایی و ژوری هەڵبژاردنی گۆڕان تێیدا ئەندامن".

سلێمانى/ بڕیار نامیق