وەفدێكی بەریتانیا و گۆڕان کۆدەبنەوە

08/10/2018

وەفدێكی كونسوڵخانەی بەریتانیا لە هەولێر، سەردانی مەكۆی سەرەكی بزوتنەوەی گۆڕان دەکات و ئەنجامەكانی هەڵبژاردنی هەرێم و تۆماركردنی سكاڵاكانی بزوتنەوەی گۆڕان و پێكهێنانی حكومەتی نوێی عێراقیان تاوتوێ دەکەن.

پێشنیوەڕۆی ئەمڕۆ سارا مارش، بەرپرسی تیمی سیاسی و وەفدێكی كونسوڵخانەی بەریتانیا لە هەرێمی کوردستان، سەردانی مەكۆی سەرەكی بزوتنەوەی گۆڕانی کرد لە شاری سلێمانی و لەگەڵ د. یوسف محەمەد، ئەندامی ئەنجومەنی نوێنەرانی عێراق و هۆشیار عومەر، رێكخەری ژوری پەیوەندییە دیپلۆماسییەكانی بزوتنەوەی گۆڕان و ئەندامانی ژورەكە كۆبونەوە.

لە كۆبونەوەكەدا وێڕای تاوتوێكردنی بارودۆخی سیاسی و ئابوری هەرێمی كوردستان و عێراق، پرسی هەڵبژاردنەكانی هەرێم و تۆماركردنی سكاڵاكانی بزوتنەوەی گۆڕان لەسەر ئەنجامی بەرایی هەڵبژاردنی پەرلەمانی كوردستان و پێكهێنانی حكومەتی نوێی عێراق گفتوگۆیان لەبارەوە كرا.