وەفدێکى باڵاى یونامى سەردانى بزوتنەوەى گۆڕان دەکات

هەواڵ و چالاکی

بزوتنەوەى گۆڕان جەخت دەکاتەوە لەوەى هەمیشە لەگەڵ ئەنجامدانى هەڵبژاردن بوە لە وادەى خۆیدا و داواش دەکات لەمپەر و بەربەستەکانى بەردەم پڕۆسەکە هەڵبگیرێن و هەڵبژاردنێکى پاک و بێگەرد بە چاودێرى یونامى و رێکخراوەکان لە وادەى دیاریکراودا ئەنجام بدرێت.

ئەمڕۆ سیشەممە (16ى7ى2024)، وەفدێکى باڵاى نەتەوەیەکگرتوەکان لە عێراق سەردانى بزوتنەوەى گۆڕانیان کرد لە مەکۆى سەرەکى لە سلێمانى و لەلایەن عومەر سەید عەلى و ژورە پەیوەندیدارەکانەوە پێشوازیان لێکرا، لە دیدارێکدا تاوتوێى دۆخى هەرێمى کوردستان و دواین پێشهاتەکان و پرسى ئامادەکارییەکانى هەڵبژاردنى پەرلەمانى کوردستان و لابردنى بەربەست و ئاریشەکانى بەردەمى کرا بۆئەوەى لە وادەى دیاریکراودا هەڵبژاردنێکى پاک و بێگەرد ئەنجام بدرێت.

چۆمان محەمەد ئەندامى جڤاتى نیشتمانى لەبارەى ناوەڕۆکى کۆبونەوەکەوە رایگەیاند: هەرێمى کوردستان پێویستى حەتمى بەم هەڵبژاردنەیە لەپێناو پاراستنى شەرعیەت و رەوایەتى دامەزراوەکانى و خودى قەوارەى هەرێمى کوردستان، لە کۆبونەکەدا گفتوگۆکرا لەبارەى گرنگى هەلبژاردن و لابردنى لەمپەر و ئەنجامدانى رێکارەکان و لە کۆبونەکەدا جەختمان کردەوە کە بزوتنەوەى گۆران یەکەم هێزى سیاسى بووە کە هیچکات لەگەڵ دواخستنى هەڵبژاردن نەبووە و "یەکەم هێزى سیاسى بوین کە پرۆژەیاسامان لەرێگەى فراکسیۆنەکەمان پێشکەشى پەرلەمان کرد بۆئەوەى هەڵبژاردن لە وادەى خۆی بکرایە، ئیستاش ئومێدەوارین ئەو ململانێ سیاسیەى لەنێوان هەندێک لایەن هەیە و ئەو دۆخ و پێشهاتانەى لە ئارادان لە روى ئەمنییەوە نەبنە هۆى دوبارە دروستکردنى بەربەرست لەبەردەم پڕۆسەکە".

وتیشى: داوامان کرد یونامى چاودێرى وردى پڕۆسەکە بکات بە ئاڕاستەى ئەنجامدانى هەڵبژاردنێکى پاک و بێگەرد و رێگرى لە ساختەکارى و پێشێکارى لەگەڵ هاندانى دەنگدەران بۆئەوەى بەشداریى سیاسى هاوڵاتیان لە پڕۆسەکە زیاد بکات.