شاندێکى دەمپارتى سەردانى بزوتنەوەى گۆڕان دەکەن

هەواڵ و چالاکی

ئەمڕۆ یەکشەممە (28ى7ى2024) شاندێکى باڵاى دەمپارتى سەردانى بزوتنەوەى گۆڕانى کرد و لە کۆبونەوەیەکیشدا بزوتنەوەى گۆڕان جەختى کردەوە بێ بەکارهێنانى چەک و بە گفتوگۆ چارەسەرى دۆزى کورد بکرێت لە باکور و رۆژئاواى کوردستان.

شاندەکەی پارتی یەکسانی و دیموکراتی گەلان (دەمپارتى) پێکهاتبون لە ژمارەیەک پەرلەمانتارانی ئەو پارتە لە تورکیا و ژمارەیەک پەرلەمانتاری پێشوی هەدەپە و چالاکوانانی سیاسی دەمپارتی، لەلایەن عومەری سەید عەلی و ژمارەیەک لە ئەندامانى جڤاتى نیشتمانى و ژورەکانى بزوتنەوەی گۆڕانەوە پێشوازییان لێکرا و تایبەت بە چەند پرسێک کۆبونەوە.

لە کۆبونەوەکەدا پرسی ئاشتی لە باکوری کوردستان و چارەسەری کێشەی کورد لە تورکیا و رۆژئاوای کوردستان گفتوگۆیان لەبارەوە کرا، پرسی ئازادکردنی سەرکردەکان و چالاکوانانی کورد لە تورکیا لەگەڵ دۆخی دەمپارتی لە باکوری کوردستان و کێشەی شارەدارییەکانی دەمپارتیش تەوەرێکى دیکەى گفتوگۆکانیان بو.

سارا عەلی، ئەندامی جڤاتی نیشتمانی بزوتنەوەی گۆڕان لەبارەی کۆبونەوەکە رایگەیاند؛ بزوتنەوەی گۆڕان جەختى کردەوە لەوەى پێویستە بەبێ بەکارهێنانی چەک و بە گفتوگۆ چارەسەری دۆزی رەوای کورد لە باکوری کوردستان و رۆژئاوای کوردستان بکرێت، هەردولاش هاوڕابون لەسەر ئەوەی هەموان لە چوارچێوەی پلانێکی نیشتمانی روبەڕوی ئاستەنگەکانی بەردەم کورد ببنەوە.