عومه‌ر سه‌ید عه‌لی و حاكم قادر جه‌خت له‌ ئەنجامدانى چاكسازی و چەسپاندنى دادپەروەری و دیموكراسی ده‌كه‌نه‌وه‌

هەواڵ و چالاکی

ئه‌مڕۆ سێشه‌ممه‌، 27/7/2021، حاكم قادر حەمه‌جان ئه‌ندامی ئه‌نجومه‌نی باڵای سیاسی و به‌رژه‌وه‌ندییه‌كانی یه‌كێتی نیشتمانی كوردستان به‌ مه‌به‌ستی پیرۆزباییكردنی ساڵیادی دامه‌زراندنی بزوتنه‌وه‌ی گۆڕان سه‌ردانی مه‌كۆی سه‌ره‌كی بزوتنه‌وه‌كه‌ی كرد و له‌لایه‌ن عومه‌ر سه‌ید عه‌لی رێكخه‌ری گشتی بزو‌تنه‌وه‌ی گۆران و ژماره‌یه‌ك له‌ ئه‌ندامانی خانه‌ی راپه‌ڕاندن و جڤاتی نیشتمانیی پێشوازی لێكرا.

له‌ دیدارێكدا، حاكم قادر حه‌مه‌جان و عومه‌ر سه‌ید عه‌لی، جه‌ختیان له‌ پته‌وكردنی په‌یوه‌ندییه‌كانی نێوان یه‌كێتی و گۆڕان كرده‌وه‌، هاوكات به‌ پێویستیان زانی گرنگی بدرێت به‌ هاوپه‌یمانێتی نێوانیان كه‌ بۆ هه‌ڵبژاردنی په‌رله‌مانی عێراق پێكهێنراوه‌ و به‌ باشترین شێوه‌ خۆیان بۆ هه‌ڵبژاردن ئاماده‌ بكه‌ن.

ئاماژەیان بەوەشكرد، پێویسته‌ حكومه‌ت زیاتر خزمه‌تگوزارییه‌كانی هاوڵاتیان دابین بكات و ئه‌و پڕۆژانه‌ی خزمه‌ت به‌ هاوڵاتیان ده‌كه‌ن، بخرێنه‌گه‌ڕ.

هه‌ردولاش هاوڕابون لەسەر ئەوەی كە پێویستە چاكسازی لەسەرجەم سێكتەرەكاندا  بكرێت و دادپەروەری كۆمەڵایەتی و ئازادی و دیموكراسی بۆ كۆمەڵانی خەڵكی كوردستان بچەسپێنرێت.