بزوتنەوەى گۆڕان بەسەرپەرشتى رێکخەرى گشتى قۆناغى گەرمى بانگەشە دەستپێدەکات
17/09/2021
هەواڵ و چالاکی
بزوتنەوەى گۆڕان قۆناغى گەرمى بانگەشەى هەڵبژاردن دەستپێدەکات و سەرپەرشتیارى
بازنەى هەڵبژاردنى سلێمانى رایدەگەیەنێت؛ تاوتوێى پلانەکانى بانگەشەى هەڵبژاردن کرا
و لەم هەفتەیەوە هەڵمەتى دەرگا بەدەرگا و گەڕەک بە گەرەک و شار بە شار و گوند بە
گوند دەستپێدەکەین بۆ ناساندن و سەرخستنى هاوپەیمانى کوردستان و لەناویاندا کاندیدەکانى
بزوتنەوەى گۆڕان.
ئەمڕۆ هەینى لە مەکۆى سەرەکى بزوتنەوەى گۆران لە شارى سلێمانى، بە سەرپەرشتى
عومەر سەید عەلى رێکخەرى گشتى و ئامادەبونى سەرپەرشتیارى سەرجەم بازنەکانى هەڵبژاردن
و سەرجەم سەرپەرشتیارى بازنەکانى هەڵبژاردن و بەشێک لە ئەندامانى جڤاتى نیشتمانى و
تیمى گۆڕان لە حکومەت، دوا کۆبونەوەى قۆناغى پلانکارى هەڵبژاردن بەڕێوەچو.
ئاسۆ رەحیم، سەرپەرشتیارى بازنەى هەڵبژاردنى سلێمانى لەبارەى ناوەڕۆکى کۆبونەوەکەوە
بە سایتى فەرمى (گۆڕان)ى راگەیاند: پلانەکانى بانگەشەى هەڵبژاردن لە کۆبونەوەکەدا گفتوگۆى
لەبارەوەکراوە، بۆ ئەوەى بزانرێت تائێستا چی کراوە.
ئەوەشى خستەڕو کە ئەمە دوا کۆبونەوە دەبێت و لێرەوە قۆناغى گەرمى بانگەشەى
هەڵبژاردن دەستپێدەکات و "لەم هەفتەیەوە لەلایەن تیمەکانى بانگەشەکردنەوە هەڵمەتى
دەرگا بەدەرگا و گەڕەک بە گەرەک و شار بە شار و گوند بە گوند لە هەموو شوێنەکان دەستپێدەکات
ئەوەش بۆ ناساندنى کاندیدەکانى هاوپەیمانى کوردستان و لەناویاندا کاندیدەکانى
بزوتنەوەى گۆڕان".
بزوتنەوەى گۆڕان و یەکێتى نیشتمانى کوردستان لە چوارچێوەى هاوپەیمانى
کوردستان بەشدارى بڕیارە هەڵبژاردنى پێشوەختەى ئەنجومەنى نوێنەرانى عێراق دەکەن کە
بڕیارە (10/10/2021) بەڕێوەبچێت.
بزوتنەوەى گۆڕان حەوت کاندیدى
لەنێو هاوپەیمانێتیەکەدا هەیە کە هەریەکە لە (برزۆمەجید لە بازنەى چوار و د.
عەبدولسەلام محەمەد لە بازنەى دوى هەولێر، شوناس شێرکۆ لە بازنەى یەک و د. رێزان
ئەحمەد هەردى لە بازنەى دوى سلێمانى، بەکر بایز لە بازنەى چوارى سلێمانى، هۆشیار
عومەر لە بازنەى پێنجى سلێمانى و محەمەد نەسرەدین لە بازنەى یەکى کەرکوک.).
فۆتۆ: بڕیار نامیق