عومەر سەید عەلى: ژنان کۆڵەکەیەکى گرنگى بزوتنەوەى گۆڕانن
01/10/2021
هەواڵ و چالاکی
رێکخەرى گشتى بزوتنەوەى گۆڕان رایدەگەیەنێت؛ ژنان کۆڵەکەیەکى
گرنگى بزوتنەوەى گۆڕانن و رۆڵ و کاریگەریی و جێ دەستیان لە بزوتنەوەکە و کۆمەڵگەدا
دیارە و داوایان لێ دەکات هانى کەسوکاریان بدەن بەشدارى پڕۆسەى دەنگدان بکەن و
هاوپەیمانى کوردستان سەر بخەن.
ئەمڕۆ هەینى عومەر سەید عەلى، رێکخەرى گشتى بزوتنەوەى گۆڕان لە
مەکۆى سەرەکى لە شارى سلێمانى لەگەڵ بەشێک لە ژنانى بزوتنەوەى گۆڕان کۆبوەوە و لە
وتەیەکدا ئاماژەى بەوە کرد کە؛ ژنان رۆڵیکى کاریگەریان هەیە لە کۆمەڵگەدا
ژن وەک دایک و خوشک و وەک پەروەردەکارى منداڵ و وەک هاوسەر، کاریگەرى
لەسەر کۆمەڵگە هەیە، بە هەمان شێوە ژنان لە بزوتنەوەى گۆڕاندا رۆڵ و پێگەیەکى
دیاریان هەیە کۆڵەکەیەکى گرنگن، بۆیە هیوادارین ئەرکى خۆتان جێبەجێ بکەن و کۆمەڵگە
هاند بدەن بۆ دەنگدان، چونکە ئەم هەڵبژاردنە پرسێکى نەتەوەییە و بەشداریی کورد لە عێراق
و نەخشەى دەسەڵاتى یاسادانانى عێراق دیارى دەکات.
عومەر سەید عەلى ئەوەشى خستەڕو بۆ ئەم قۆناغە، هاوپەیمانى کوردستان
باشترین بژاردەیە بۆ نوێنەرایەتى خەڵکى کوردستان لەپێناو بەدەستهێنانى مافە
دەستورییەکان لە سەرو هەمویانەوە موچە و بودجە و شایستە داراییەکان، لەگەڵ دابینکردنى
سەقامگیرى و یەکڕیزى و خزمەتگوزارییەکى باشتر بۆ خەڵکى کوردستان.
وتیشى:"بزوتنەوەى گۆڕان لە حەوت بازنە حەوت کاندیدى هەیە
لە چوارچێوەى هاوپەیمانى کوردستان، کاندیدانى گۆڕان لە باشترین بژاردەکانى نێو
بزوتنەوەکەن و هەمویان خەڵکى خوێندەوار و تێکۆشەر و خاوەن کەسایەتى بەهێزن، لە
بنەماڵەى کوردپەروەر و قوربانیدەرەوە هاتون و دەتوانن ببنە نوێنەرى راستەقینەى
خەڵکى کوردستان، بۆیە پێویستە پاڵپشتییان بکەن".