بزوتنەوەی گۆڕان: پەلە بكرێت لە قەرەبوکردنەوە و ئاسایکردنەوەی ژیانی قوربانیانی ئێزدی

ڕاگەیەندراوی فەرمی

‎ ئەمڕۆ، سێی ئابی ٢٠٢٢، ھەشتەمین ساڵڕۆژی جینۆسایدی ئێزدییەکان و یادی تاوانێکی گەورەی رێکخراوی تیرۆریستی داعشە دەرھەق بە هاوڵاتیانی ئێزدی لەشەنگال. لەم بیروەرییە خەمھێنەدا؛ وێڕای هاوخەمی بۆ کەسوکاری شەھیدان و قوربانیان؛ داکۆکی دەکەین بۆ بەدەمەوەچوونی داواکانیان و ئاسایکردنەوەی ژیان و گەیاندنی دەستی ئاوەدانی بۆ ناوچە زیانلێکەوتوەکان.

‎ لە روانگەی ئێمەوە، ئەم تاوانە کۆمەڵکوژی و تاوانێکی مرۆیی گەورەیە بەرامبەر ھاوڵاتیانی ئێزدی، کە بەداخەوە پێنج هەزار ژن و منداڵ و پیاو بوونە قوربانی و، زیاتر لە دوو هەزار ھاوڵاتی دیکە بێسەروشوێن کران و بە ھەزارانی دیکەش ئاوارەی کەمپەکان و وڵاتانی دەرەوە بون.

‎ھەربۆیە بەرپرسیارێتی ناوخۆیی و نێودەوڵەتی لەسەر شانی حکومەتی ھەرێم و حکومەتی ئیتحادی و رێکخراوە نێودەوڵەتیەکانە بۆ قەرەبوکردنەوەی ماددی و مەعنەوی شەنگال و کەسوکاری قوربانیان، ھاوکات دیاریکردنی چارەنوسی بێ سەروشوێنکراوان و ئاسایکردنەوەی دۆخی ئاسایشی ناوچەکە کە بە رێککەوتنی لایەنەکان بۆ گەڕانەوەی ئاشتی و ئارامی و ئۆقرەیی دەستەبەر دەبێت.

بزوتنەوەی گۆڕان
٨ی٣ی٢٠٢٢