هاوسەرۆکى کۆنگرەى نەتەوەیى کورد سەردانى بزوتنەوەى گۆڕان دەکات
06/03/2023
هەواڵ و چالاکی
بزوتنەوەى گۆڕان رایدەگەیەنێت؛ لە ئەرکە
نیشتیمانى و نەتەوەییەکاندا درێغى ناکەین و پاڵپشت و هاوکارین بۆ پشتیوانى دۆزى
رەواى کورد.
ئەمڕۆ دوشەممە (6/3/2023)، شاندێکى کۆنگرەى نەتەوەیی کوردستان (کەنەکە) سەردانى مەکۆى سەرەکى بزوتنەوەى
گۆڕانیکرد و لەلایەن عومەر سەید عەلى و رێکخەر و ئەندامانى ژورى پەیوەندییە سیاسییەکانەوە
پێشوازیان لێکرا.
دواى کۆبونەوەکە، ئەحمەد قەرەموس هاوسەرۆکى کەنەکە لەلێدوانێکى
رۆژنامەوانیدا ستایشى پێشوازى گەرمى بزوتنەوەى گۆڕانى کرد و رایگەیاند: ئامانجی
سەردانەکەمان ئەوەیە کە کۆنفڕانسی (١٠٠) ساڵەى پەیمانى لۆزان هەیە کە زیانى گەورەى
لە گەلى کورد داوە و هیچ کاتێک کورد ئەو پەیامانەى قبوڵ نەبوە، کۆنگرەى نەتەوەیی
کوردستان دەخوازێت بە هەستێکى نیشتیمانی و نەتەوەیی هەڵوێستەکانمان دیاری بکەین و
بۆ ئەوەش سەردانى لایەنە سیاسییەکان دەکەین.
لای خۆیەوە، بەختیار عومەر رێکخەرى ژورى پەیوەندییە سیاسییەکانى
بزوتنەوەى گۆران رایگەیاند: بزوتنەوەى گۆڕان لەناو کۆنگرەى نەتەوەیی ئەندامێکى
چالاکە، ئێمە وەک ئەرکێکى نیشتمانى و نەتەوەیی لێى دەڕوانین و ئەوەى بکەوێتە
سەرشان و ئەستۆمان لە پرسە نەتەوەیی و نیشتیمانییەکاندا درێغی ناکەین و پشتیوان و
هاوکارین.