شاندێکى یونامى سەردانى گۆڕان دەکات
02/05/2023
هەواڵ و چالاکی
شاندێکى یونامى
بۆ تاوتوێکردنى پرسى هەڵبژاردن سەردانى گۆڕان دەکات و رێکخەرى ژورى دیپلۆماسیش
رایدەگەیەنێت: روانینى بزوتنەوەى گۆڕانمان دوپاتکردەوە و پرۆژە و هەوڵەکانى
گۆڕانیشمان خستەڕو کە دو ساڵ لەمەوبەر پێشکەشى کردوە بۆئەوەى هەڵبژاردن
دوانەکەوێت.
ئەمڕۆ سێشەممە (2023/5/2)،
ریکاردۆ رۆدریگێز بەرپرسى ئۆفیسى هەولێرى یۆنامى بە نوێنەرایەتى نەتەوەیەکگرتوەکان
سەردانى مەکۆى سەرەکى بزوتنەوەى گۆڕانى کرد و لەلایەن شاندى گۆڕان بە سەرۆکایەتى
عومەر سەید عەلى و رێکخەرى ژورى پەیوەندى دیپلۆماسى و سەرپەرشیارانى ژورى
هەڵبژاردن و سەرچاوە مرۆییەکان پێشوازیان لێکرا.
لەارەى ئامانجى
سەردانەکە و ناوەڕۆکى کۆبونەوەکەوە، هۆشیار عومەر عەلى، رێکخەرى ژورى پەیوەندی دیپلۆماسى
بزوتنەوەى گۆڕان رایگەند: ئامانجى سەردانەکەى شاندى یونامى بۆ وەرگرتنى بۆچونى
بزوتنەوەى گۆڕان بو سەبارەت بە پرسى هەڵبژاردن، لە کۆبونەوەکەدا ئەوەمان رونکردەوە
کە بڕواى نەگۆڕى بزوتنەوەى گۆڕان ئەوەیە هەڵبژاردن مافێکى خەڵکە و هیچ هێز و
لایەنێک بۆى نیە ئەو مافە لەخەڵک وەربگرێتەوە دوپاتیشمان کردەوە کە بزوتنەوەى گۆڕان
دوساڵ لەمەوبەر و پێش سەرهەڵدانى ئەم قەیرانە لە (31/3/2021) وەک یەکەم هێزى سیاسى
و لەڕیگەى فراکسیۆنە پەرلەمانیەکەیەوە پڕۆژە یاساى بۆ هەموارى یاساى هەڵبژاردن
پێشکەشکرد، بەڵام لەو کاتەدا نە هیچ لایەنێک پڕۆژەى هەبو نە بەدەم داواکاریەکەوە
هاتن و نەشیانخستە بەرنامەى کارى پەرلەمانەوە.
ئەوەشى خستەڕو
کە لە دیدارەکەدا تێڕوانینى گۆڕان پەیوەست بە هەڵبژاردن و وادەکەى و بازنەکانى
هەڵبژاردن و پێکهاتەکان بە رونى بۆ شاندى میوان خرایەڕو.
پەیوەست بە
هەوڵەکانى نەتەوەیەکگرتوەکان و کۆمەڵى نێودەوڵەتى، رێکخەرى ژورى پەیوەندى
دیپلۆماسى گۆڕان دەڵێت: یونامى زۆر هەوڵیانداوە کوردستان لەو بنبەستە دەربچێت و
پێشنیازیشیان هەیە بۆ هەڵبژاردن و پرسى پێکهاتەکان کە ناکۆکى هەندێک لایەنەکانى
لەسەرە، "ئەوان بێزارن لە ململانێ و کێشەکانى نێوان هێزەکانى دەسەڵات و بە
گرنگى دەزانن هەڵبژاردن چیتر دوانەخرێت و دڵسۆزانە فشار دەکەن بۆ چارەسەرى کیشەکان
بەڵام ئەو لایەنە سیاسیانە ئامادە نین ناکۆکییەکانى نێوانیان چارەسەر بکەن".