فراکسیۆنى گۆڕان: پێویستە حکومەت و پەرلەمان رێگربن لەوەى ژیانى هاوڵاتیان قورستر بکرێت

فراکسیۆنى گۆڕان لە پەرلەمانى کوردستان، دو یاداشت ئاڕاستەى سەرۆکایەتى پەرلەمان دەکات و داوا دەکات پەرلەمان و حکومەت رێگرى لە قۆرخکردنى بازاڕ لەلایەن هەندێک لە بازرگانان و بەرزرکردنەوەى نرخى پێداویستیەکانى ژیانى هاوڵاتیان بکەن.

لە دو یاداشتى جیاوازدا کە ئاڕاستەى سەرۆکایەتى پەرلەمانى کوردستانیان کردوە، فراکسیۆنى گۆڕان داواى هەنگاونانى حکومەت و پەرلەمان دەکەن بۆ رێگرى لەو بەرزبونەوەیەى نرخى پێداویستیەکانى ژیان و نان و نرخى بەنزینى گرتوەتەوە.

هاوکات فراکسیۆنى گۆڕان لە پەرلەمانى کوردستان رایدەگەیەنێت، لە ساڵانى رابردودا ژمارەیەک یەکەى نیشتەجێبون لە هەرێمى کوردستان دروستکراون و بە نیوە ناچڵى بەجێهێڵراون.

هەروەک لە یاداشتەکەیاندا فراکسیۆنى گۆڕان داوا لە سەرۆکایەتى پەرلەمانى کوردستان دەکەن، حکومەتى هەرێم پابەند بکرێت بە تەواوکردنى ئەو پڕۆژانە و دابەشکردنیان بە زوترین کات.