پەرلەمانتارێکى گۆڕان: بەڵگەى گەندەڵی و قۆرخکاری و پێشنیازى چارەسەرمان داوەتە وەزارەتى سامانە سروشتییەکان

پەرلەمانتارێکى گۆڕان رایدەگەیەنێت؛ لە کۆبونەوەی لیژنەی وزەو سامانە سروشتیەکان لەگەڵ وەزارەتی سامانە سروشتیەکان چەندین بەڵگە بۆ گەندەڵی و قۆرخکاری و یاداشت و پێشنیاز بۆ چارەسەری گرفتی غاز لەهەرێمی کوردستان پێشکەش کران.

بەڵێن ئیسماعیل، ئەندامى پەرلەمانى کوردستان لە فراکسیۆنى گۆڕان لەبارەى هۆکارى قەیرانى نەبون و گرانى غاز و بەنزین و نەوتى سپى بە سایتى (گۆڕان)ى راگەیاند: لە چەند رۆژى رابردو بۆ بۆ هەندێک پرسى گرانبونى غاز و نەوتى سپى و بەنزین کۆبونەوەى لیژنەى سامانە سروشتیەکان و وەزارەتى سامانە سروشتیەکان ئەنجامدرا و منیش لەسەر داواى خۆم بەشداربوم، ئێمە پێمانوایە قەیرانى غاز لە هەرێمى کوردستان دەتوانرێ چارەسەر بکرێت.

وتیشى: لە بابەتى غازى (ئێڵ پی جى) تاڕادەیەکى زۆر قۆرخکارى کراوە و دراوە بە کۆمپانیایەک و ساڵى رابردو هەر تەندەرى بۆ نەکراوە و ئەمساڵیش بەنیاز نین تەندەرینى بۆ بکەن و قۆرخ کراوە تارادەیەکى زۆر، جگە لەوە ئێستا کە قەیرانى غازى ماڵان هەیە و نرخەکەى بەرز دەبێتەوە کۆمپانیاى ساوز کوردستان غاز هەناردەى دەرەوە دەکات، لە هەمان کاتدا خەڵک دەتوانێت لە عێراقەوە غاز بیهێنێت و بە کەمتر لەو نرخەى بازاڕ بیفرۆشێت، بەڵام تائێستا رێگرى لێ دەکرێت.

ئەو پەرلەمانتارە دەشڵێت: بۆ هەمو ئەو پرسانە کۆمەڵێک بەڵگەى گەندەڵی و قۆرخکاریمانە داوەتە وەزارەتى سامانە سروشتییەکان، هاوکات یاداشت و پێشنیازیشیان دراوەتێ بۆ چارەسەری گرفتی غاز لەهەرێمی کوردستان.