کاردۆ محەمەد: پێویستمان بە یاسایەکە لە خزمەت بەهێزکردنى پێگەى پەرلەمان و هەڵبژاردنێکى پاک و بێ گەرد و بێ کێشەدا بێت

14/02/2022

رێکخەرى ژورى پەرلەمانى بزوتنەوەى گۆڕان رایدەگەیەنێت؛ لەگەڵ ئەوەداین هەڵبژاردن لە وادەى خۆیدا ئەنجام بدرێت، بەڵام پێویستمان بە یاسایەکە کە لە خزمەت بەهێزکردنى پێگەى پەرلەمان و هەڵبژاردنێکى پاک و بێ گەرد و بێ کێشەدا بێت.

دواى ئەوەى ئەمرۆ دوشەممە شاندێکى سەرۆکایەتى هەرێم سەردانى بزوتنەوەى گۆڕانى کرد، لەکۆنگرەیەکى رۆژنامەوانیى هاوبەشدا دڵشاد شەهاب لەبارەى ئامانجى کۆبونەوەکەوە وتى: لە ئێستادا گفتوگۆیەکى گەرم و کوڕ هەیە لەسەر هەڵبژاردنى پەرلەمانى کوردستان لەو چوارچێوەیەدا سەردانى لایەنە سیاسییەکان دەکەین و بۆئەوەى بزانین تا چ ئاستێک بتوانین هاریکار بین و زەمینە سازى بکرێت بۆ بەڕێوەچونى هەڵبژاردنەکان.

لاى خۆیەوە کاردۆ محەمەد، رێکخەرى ژورى پەرلەمانى بزوتنەوەى گۆڕان رایگەیاند: ئامانجى سەردان و کۆبونەوەکە تاوتوێکردنى پرسى هەڵبژاردن بو کە مۆرکى دەرستورى و رەهەندى نیشتیمانیشى هەیە، مەبدەئیەن لەسەر ئەوە کۆ رابوین کە پێویستە بە گفتوگۆ و سازان بڕیار لەسەر هەڵبژاردن بدرێت لە هەرێمى کوردستان کە سەرۆکایەتى هەرێم لە روى یاساییەوە پەیوەندیدارە بەوەى رۆژى ئەنجامدانى دیارى بکات.

وتیشى: بزوتنەوەى گۆڕان بە پێویستى دەزانێت هەڵبژاردن لە وادەى خۆى ئەنجام بدرێت، بەڵام پیویستیشە یاساى هەڵبژاردن لە خزمەت بەهێزکردنى پەرلەمان و هەڵبژاردنێکى پاک و بێ گەرد و بێ کێشەدا بێت واتە یاساکە بەشێوەیەک بێت کە هەم کەسانێک بچنە ناو پەرلەمان کە خاوەن بڕیارى سیاسى بن هەم لە روى تایبەتمەندییەوە خەڵکێک بێتە پەرلەمان کە پسپۆڕییان هەبێت بۆئەوەى پەرلەمانێکى بەهێز و کاریگەرمان هەبێت.

ئاماژەى بەوەشکرد کە لایەنى هونەریى پەیوەندى بە دامەزراوە تایبەتمەندەکانەوە هەیە.

لەبارەى پرسى دەستوریشەوە وتی: دەستورێکى هاوچەرخ و دیموکراتى بۆ هەرێمى کوردستان زەرورییە.


هەواڵی زیاتر