سەرۆکى فراکسیۆنى گۆڕان: یاساى بودجە بنێردرێتە پەرلەمان بۆئەوەى داهات شەفاف بێت و بە یەکسانى دابەش بکرێت

سەرۆکى فراکسیۆنى گۆڕان داوا دەکات یاساى بودجە بنێردرێتە پەرلەمان بۆئەوەى داهات شەفاف بێت و کۆتایی بە دوئیدارەیی و دو دارایی بهێنرێت و داهات بە یەکسانى بەسەر  ناوچەکاندا دابەش بکرێت.

گوڵستان ئیسماعیل، سەرۆکى فراکسیۆنى گۆڕان لە پەرلەمانى کوردستان لە کۆنگرەیەکى رۆژنامەوانیدا ئاماژەى بەو مەترسی و ناکۆکییانە کرد کە لەنێوان هەندێک لە لایەنە سیاسییەکان هەیە و رایگەیاند؛ بۆ بونى شەفافى لە داهات و خەرجیەکان، پێویستە بۆ ساڵى (2023) حکومەت یاساى بودجە بێتە پەرلەمان و پەسەند بکرێ، کۆتایی بهێنرێ بەو رەوشە ناهەموارەى هەیە لە روى دیارنەمانى داهات و دو زۆنیى ئیدارەیی دو زۆنى دارایی و ئەو داهاتەى لە هەرێمى کوردستان هەیە یەکبخرێت و بە یەکسانى بەسەر ناوچەکانى کوردستان دابەش بکرێ.

لەبارەى دۆخى سیاسیشەوە، سەرۆکى فراکسیۆنى گۆڕان وتى: دۆخێکى مەترسیدار لە ئارادایە و پێویستە هێز و لایەنە سیاسییەکان هەست بە بەرپرسیارێتى بکەن و لەسەر مێزى گفتوگۆ کۆببنەوە بگەن بە رێگاچارەسەرێک بۆ ئەو کێشە و ناکۆکیانەى لە نێوانیادایە و "بتوانن بە یەکگرتویی رەوشى سیاسى و ئیدارى هەرێمى کوردستان بەڕێوە ببەن و ئومێد ببەخشنەوە، بۆئەوەى چیتر مەترسى لەسەر ژیان و قوتى خەڵک دروست نەبێت".