رێکخەرى ژورى پەرلەمان: پێویستمان بەیەک دەسەڵات و یەک ئیدارە هەیە کە خەڵک هەڵیبژێرێت

رێکخەرى ژورى حکومەت و پەرلەمانى بزوتنەوەى گۆڕان رایدەگەیەنێت؛ تائێستا نەمانتوانیوە حکومەتێک بە ئیدارەیەکی تەندروست بەڕێوەبەرین، لەکاتێکدا پێویستمان بەیەک دەسەڵات و یەک ئیدارە هەیە کە خەڵک هەڵیبژێرێت و چارەسەرى ئەم دۆخەش بەوە دەکرێت کە سەرکردە سیاسییەکان بە یەک ئیرادەی بەرپرسیارێتی سیاسی و ئەخلاقی لە دۆخەکە بگەن.

کاردۆ محەمەد، رێکخەرى ژورى پەرلەمانى بزوتنەوەى گۆڕان ئەمڕۆ یەکشەممە (22/1/2023) لە کۆنگرەیەکی رۆژنامەوانیدا رایگەیاند: تائێستا نەمانتوانیوە حکومەتێک بە ئیدارەیەکی تەندروست، نەک بە لێکەوتەنەکانی دو دەسەڵات بەڕێوەبەرین لەکاتێکدا پێویستمان بە یەک دەسەڵات و یەک ئیدارە هەیە "ئەمە بەشێوەیەک چارەسەر دەکرێت کە سەرکردە سیاسییەکانی کورد، بە یەک ئیرادەی بەرپرسیارێتی سیاسی و ئەخلاقی لە دۆخەکە بگەن و کۆتایی بەو شێوازە بهێنن و بچینە ڕێگایەکی دیکە کە ڕێگای خەڵکە، خەڵک بکەینە حەکەم و خەڵک بڕیار بدات کێ کوردستان بەڕێوەبەرێت".

 لەپارەى پرۆسەى دیموکراسى بۆ حکومڕانى، دەڵێت: ئایا ئێمە هەمومان کۆکین لەسەر ئەوەی کوردستان حوکمێکی دیموکراسی هەبێت؟، چونکە سیستمی دیموکراسیش رێسای خۆی هەیە، ئەوەی گرنگە ئەو ئیرادەیە کە قۆناغێک دادەنێت کە کۆتایی بەو ململانییە دەهێنێت .

ئاماژە بەوەش دەکات؛ ستراتیژى هاوبەشى نیشتیمانى بە رەمزە هاوبەشەکان و کۆدەنگى لەسەر رێساکەى و پشتیوانى خەڵک دەبێت، "ئومێد دەکەین شەڕەکانمان بۆ ئەو کۆدەنگى و ستراتیژە هاوبەشە بێت کە وڵاتەکەمان پارێزێت، چونکە تاکە شوێن کە دانپێدانانی دەستورى و نێودەوڵەتی هەیە هەرێمی کوردستانە، بۆیە نائومێدکردنى و خراپ بونى و دروستکردنى کێشە بۆى، رەنگدانەوەی دەبێت لەسەر هەمو کوردستان و رۆژهەڵاتی ناوەڕاستیش".