ئەندامێکى جڤاتى نیشتیمانى: ناکۆکییە حیزبى و شەخسییەکانى یەکێتى و پارتى و گوێنەگرتنیان لە پڕۆژەکانى گۆڕان، زیانى گەورەى بە بەرژەوەندییە نیشتیمانییەکان گەیاندوە

ئەندامێکى جڤاتى نیشتیمانى بزوتنەوەى گۆڕان رایدەگەیەنێت؛ مامەڵەى خراپى یەکێتى و پارتى و ناکۆکییەکانیان لەپیناو بەرژەوەندییە حیزبى و بنەماڵەیی و شەخسیەکان و گوێنەگرتنیان لە پڕۆژەکانى گۆڕان بۆ چاکسازى و یەکخستنەوەى پێشمەرگە و حکومڕانى رەشید، زیانى گەورەى بە بەرژەوەندییە نیشتیمانییەکان گەیاندوە و وایکردوە هاوپەیمانانیش ئەو مامەڵەیەى رابردوو لەگەڵ هەرێمى کوردستان ناکەن.

بەهادین ئەحمەد باژێروانى سلێمانى بزوتنەوەى گۆڕان و ئەندامى جڤاتى نیشتیمانى، ئاماژە بەوە دەکات؛ کورد سەدان ساڵ قوربانى داوە لەپێناو ئامانجى نەتەوەیی و نیشتیمانى تا ئەوەى هەلێکى مێژویی بۆ رەخسا بە دروستبونى ئەم هەرێمە کە لەدواى راپەڕینەوە وەک قەوارەیەکى سیاسى مامەڵەى لەگەڵ کراوە و هاوپەیمانانیش وەک کیانێکى سەربەخۆ مامەڵەیان لەگەڵ دەکرد، بەڵام بەداخەوە بەهۆى ئەوەى پارتى و یەکێتى نەیانتوانى لەپێناو بەرژەوەندییە نیشتیمانییەکاندا کاربکەن، هەر لە دو ئیدارەییەوە تا ململانێ و ناکۆکى لەپێناو بەرژەوەندى حیزبى و بنەماڵەیی و شەخسى ئەو شکستانەى هێناویانە وایکردوە دۆخەکە تەواو پێچەوانە بوەتەوە و ئێستا ئەو مامەڵەیە لەگەڵ هەرێمى کوردستان ناکرێت.
یەکێتى و پارتى کە لەژێر کاریگەرى ئەجێنداى وڵاتانى ئیقلیمی و بۆ بەرژەوەندییەکانى خۆیان ململانێ دەکەن و ناکۆکییەکانیان بە ئاڕاستەى ملشکاندنى یەکترییە، تا دواجار بوەتە هۆى لێدان لە بەرژەوەندییەکانى گەل و نیشتیمان، لەکاتێکدا دەبو بەرژەوەندییە نیشتیمانییەکان بکرێتە هۆى بەهێزکردنى پێگەى هەرێمى کوردستان.

لەبارەى دۆخى پێشمەرگە و ئاڵنگارییە نوییانەى لەئارادان، ئەندامەکەى جڤاتى نیشتیمانى دەڵێت: بزوتنەوەى گۆڕان باشترین بەرنامە و پاکێج و پڕۆژەى هەبوە بۆ یەکخستنەوەى هێزى پێشمەرگە و بە نیشتیمانیکردنى دامەزراوەکان و بەهێزکردنى پێگەى هەرێم و ژیرخانەکەى، بەڵام بەداخەوە لەلایەن پارتى و یەکێتییەوە گوێیان لێنەگیرا و خۆشیان نەیانتوانى دەوڵەتدارى و نمونەیەکى جوان پێشکەش بکەن، بۆیە دۆخەکە بەم ئاقارەدا رۆیشتوە.