د.محەمەد شوانی: نابێت کورد لە پڕۆسەی هەڵبژاردن لە کەرکوک سارد ببێتەوە

ئه‌ندامێکی جڤاتی نیشتیمانى بزوتنه‌وه‌ی گۆڕان رایدەگەیەنێت؛ ئه‌گه‌ر لایەنە سیاسییەکانى کورد لە رابردودا به‌رنامه‌یه‌كی وردی نه‌ته‌وایه‌تی و نیشتیمانی هه‌بوایه‌ ئه‌و مه‌ترسییانەى لە کەرکوک و ناوچە دابڕێنراوەکان لەسەر کورد هەیە دروست نه‌ده‌بو، بەڵام لەگەڵ ئەوەشدا نابێت کورد لە پڕۆسەی هەڵبژاردنی ئەمجارە لە کەرکوک سارد ببێتەوە و پێویستە جیاوازییەکان وەلا بنرێت و بە چڕى بەشدارى پڕۆسەکە بکەن.

د.محەمەد شوانی، رێکخەری ژوری ناوچە کوردستانییە دابڕێنراوەکانی بزوتنەوەی گۆڕان، رایدەگەیەنێت؛ سه‌ره‌ڕای ئه‌وه‌ی ئه‌و هه‌مو تاوانه و سته‌مه‌ی به‌سه‌ر پێكهاته‌ كوردا هاتوه‌، به‌ڵام هیچ لایه‌ن و كه‌س و حزبێك له‌ پێكهاته‌كانی كه‌ركوك گومانیان له‌وه‌ نییه‌ كه‌ پێكهاته‌ی كورد زۆرینه‌ی پارێزگای كه‌ركوكە، ئەگەر كورد زیاتر یه‌كگرتو بوایه‌ پێكه‌وه‌ له‌  ناو لیستێكدا نه‌ك بەم په‌رش و بڵاویه‌ ئەوا بە دڵنیاییەوەزۆرینە دەبو.
وتیشی: سه‌ره‌ڕای جیاوازییه‌كان پێویسته‌ كورد چاوی له‌سه‌ر كه‌ركوك بێت، چونكه‌ مافی راسته‌قینه‌ی كورده، پێویستە پێكهاته‌ی كورد له‌پارێزگای كه‌ركوك له‌ڕێگه‌ی سندوقه‌كانی ده‌نگدان و به‌شداری سیاسییەوە پۆسته‌كانی وه‌ربگرێته‌وه‌.

د. محەمەد شوانى، ئاماژە بەوە دەکات؛ ئه‌گه‌ر كورد به‌رنامه‌یه‌كی وردی نه‌ته‌وایه‌تی و نیشتیمانی هه‌بوایه‌ لە ساڵانى رابردودا ،‌ ئه‌و ئه‌گه‌ره‌ی له‌سه‌ر مه‌ترسی له‌ده‌ستدانی پۆستی پارێزگاری كه‌ركوك هه‌یه‌، دروست نه‌ده‌بو.