باژێروانى سۆرانى گۆڕان: زۆرێک لەو روداوانەى کارەساتیان لێدەکەوێتەوە، هۆکارەکانیان کەمتەرخەمى و جێبەجێنەکردنى یاسا و رێکارەکانى سەلامەتییە

باژێروانى سۆرانى بزوتنەوەى گۆڕان وێڕاى دوپاتکردنەوەى هاوخەمى بۆ قوربانیانى روداوەکەى سۆران، رایدەگەیەنێت؛ زۆرێک لەو روداوانەى رۆژانە هاوڵاتیان بەهۆیانەوە دەبنە قوربانى و کارەساتى گیانى و ماڵییان لێدەکەوێتەوە، هۆکارەکانیان کەمتەرخەمى و جێبەجێنەکردنى یاسا و رێکارەکانى پاراستنى گیانى هاوڵاتیانە.

شەوقى سورچى باژێروانى سۆرانى بزوتنەوەى گۆڕان بە ئەرکى حکومەت و لایەنە پەیوەندیدارەکانى دەزانێت پێش روداوەکان رێکار و رێنماییەکان جێبەجێ بکەن لەپێناو پاراستنى گیانى هاوڵاتییان و دەڵێت: بەداخەوە کەموکورتى هەیە لە جێبەجێکردنى مەرج و رێنماییەکانى پاراستنى سەلامەتى تەنانەت ئەو روداوە نەخوازراوانەى رۆژان رودەدەن لە ئەنجامى هەڵگرتنى چەکى نایاسایی و خنکان و سوتان هۆکارەکانیان سەروەرنەبونى یاسا و جێبەجێنەکردنییەتى.

باژێروانى سۆرانى گۆڕان جەخت دەکاتەوە لەوەى دابینکردنى خزمەتگوزاری و پێداویستییەکان ئەرکى حکومەت و لایەنە پەیوەندیدارەکانە، چونکە خەڵک شایستەى ئەوە نییە بەهۆى سیاسەتى هەڵەى دەسەڵاتدارانەوە ئەم هەمو قەیرانە بەرۆکى گرتون، "تا دەستوەردان و کەمتەخەمى بەردەوام بێت، بەداخەوە چەندبارەبونەوەى کارەساتى هاوشێوە چاوەڕوانکراوە، بۆیە پێویستە لایەنە پەیوەندیدارەکان بەرپرسیارانە مامەڵە بکەن".

ئەوە لەکاتێکدایە؛ بزوتنەوەی گۆڕان پەیامێکى هاوخەمى بۆ روداوى ئاگرکەوتنەوەکەى سۆران بڵاودەکردەوە و تێیدا ئاماژەى بەوەکردبو؛ سەرەڕای هاوخەمی قوڵمان بۆ بنەماڵەی قوربانیان و هیوای هەرچی زووە چاکبونەوە بۆ بریندارەکان، داواکارین لایەنە پەیوەندیدارەکان، هۆکارە بنچینەییەکانی ڕودانی سوتانی ئەو باڵەخانەیە دیاری بکەن و ڕێوشوێنی پێویست بگیرێتەبەر بۆ دوبارەنەبونەوەی ئەو حاڵەتە تراژیدیایانە، کە بەداخەوە چەند جارێکە، لە چەند شوێنێکی هەرێمی کوردستان دوبارە دەبێتەوە.