نەمسا؛ نوێنەرى گۆڕان بەشداریی کۆبونەوەیەکى باڵیۆزخانەى عێراق دەکات

نوێنەرى گۆڕان لە نەمسا بەشداریی کۆبونەوەیەکى نوێنەری لایەنە سیاسیە عێراقی و کوردستانیەکان دەکات کە لەلایەن باڵیۆزى عێراق لەو وڵاتە رێکخرابو.

کۆبونەوەکە لەسەر بانگهێشتی بەکر فەتاح باڵیۆزی کۆماری عێراقی فیدراڵ و حیدەر الصمیدعی کونسوڵی عێراقی فیدراڵ لە ووڵاتی نەمسا بەڕێوەچو، تێیدا گفتوگۆ لەبارەى دۆخى سیاسى عێراق و کۆتا هەڵبژاردنەکان و پەرەسەندنە نوێیەکان کرا و باڵیۆزى عێراق بەوردی باسی کاروبارەکانى باڵوێزخانەکەی کرد و ئەوەشى خستەڕو کە هەمو هەوڵەکانیان بە ئاڕاستەى پەرەپێدانى پەیوەندییەکانە لەو چوارچێوەیەدا لە هەوڵی بەردەوامدان بۆ کردنەوەی گەشتى فڕۆکەوانی نێوان نەمسا و عێراق لەکاتێکی نزیکدا و ئاماژەى بەوەشکرد هەوڵ دەدەن ببنە بەشێک لە چارەسەر بۆ کێشەى کارەبا لە عێراق و لەو روەوە ۆرڵى خۆیان ببینن.

هاوڕێ غەفور بە نوێنەرایەتى ژورى رەوەندى کوردى بزوتنەوەى گۆڕان و هەڵسوڕاوانى نەمسا، لە کۆبونەوەکە و دیدارى لەگەڵ نوێنەرى لایەنە سیاسییەکان، جەختى لە پرەنسیپ و بەرنامەى گۆڕان کردەوە بۆ بەدامەزراوەییکردنى سیستمى حوکمڕانى و رێکخستنى پەیوەندییەکان و حوکمڕانییەکى باش کە هاوڵاتى تێیدا سەنتەر بێت.