كۆڕی ژوری ڕەوەندی كوردی لە ساڵیادی كۆچی دوایی سەركردەی نیو سەدە لە خەباتی گەلی كورد

بە بۆنەی نۆیەم ساڵیادی کۆچی دوایی رەوانشاد نەوشیروان مستەفا، سەركردەی نیشتیمانی گەلی كورد، ژووری ڕەوەندی کوردی بزوتنەوەی گۆڕان بە سەرپەرشتی فوئاد جەمال سەلام رێکخەری ژور و بەشداری ژمارەیەک لە هەڵسوڕاوان و چالاکوانانو هاوڕێ و دۆستانی نزیکی ڕەوانشاد، كۆڕێكی رێكخست.

لە کۆڕەکەدا كە نزیکەی دوو کاتژمێری خایاند،  لە گفتوگۆی بەشداربوواندا جەخت لەوەكرایەوە كە نەوشیروان مستەفا ئەو سەركردەیەبوو ژیانی خۆی تەرخان کرد بۆ خزمەتکردن بە گەلەکەی و ناوی خۆی بە پیتی زێڕین لە مێژووی خەبات و ڕۆشنبیریی کوردیدا تۆمار کرد، چونكە ئەو تەنها سەرکردەیەکی سیاسی نەبوو، بەڵکو هزر، قوتابخانە و ڕێگایەک بوو بۆ هەموو ئەوانەی خەونی کوردستانێکی دادپەروەر و ئازادیان دەبینی، ئەو لە تەمەنی گەنجیدا ژیانی ئارام و داهاتوویەکی گەورەی لە ئەوروپا بەجێهێشت و گەڕایەوە بۆ شاخ و خەبات، چونکە باوەڕی وابوو کەرامەت و شانازیی مرۆڤ لە خزمەتکردن بە گەل و نیشتمانەکەیدایە.

ئەوە بیرهێنرایەوە كە نەوشیروان مستەفا لە ناو شاخ و خەبات و شاریشدا هەرگیز خۆی لە ئازاری خەڵک دوور نەدەخستەوە، خەمی ئازادی و هەژاری و ستەم و نادادپەروەریی، خەمی ئەو بوو هەر بۆیە زۆر کەس ئەویان وەک دڵسۆزێکی نیشتمانی و مامۆستایەکی ڕۆشنبیر دەناسی، نەک تەنها وەک سەرکردەیەکی سیاسی ئەو هەمیشە دەیگوت پێش ئەوەی نیشتمان لە خاکدا ئازاد بێت، دەبێت لە هزر و عەقڵدا ئازاد بێت.
لە كۆڕەكەدا دووپاتكرایەوە كە ئەو سەركردە نیشتمانییە هیچكات دەسەڵاتخواز نەبووە، بەڵكو سەركردەی بە پرەنسیپ و خاوەن ویژدان و نزیك لە خواست و خەمی خەڵك و خاك بوە و لەپێناو بیر و باوەڕیدا دەسبەرداری پۆست و دەسەڵات بووە.
هاوكات گفتوگۆكرا لەبارەی ئەوەی چۆن بە دامەزراندنی بزوتنەوەی گۆڕان لە ساڵی (٢٠٠٩)، گۆڕەپانی سیاسی جۆشدایەوە و نەوشیروان مستەفا بوو بە دامەزراندنی بزوتنەوەیەكی جەماوەری بو بە دەنگی هیوا و گۆڕان بۆ هەزاران گەنج و ڕۆشنبیر و خەڵکی نارازی لەپێناو چاكسازی و چەسپاندنی دادپەوەری دامەزراندنی سیستەمێکی دامەزراوەیی و مۆدێرن، کە تیایدا یاسا، دادپەروەری، چاودێری دەسەڵات و مافی هاوڵاتی بنەمای کار بێت.
لە كۆڕەكەدا؛ نوسین و كتێبەكانی نەوشیروان مستەفا بوونە جێی گفتوگۆی بەشداربووان وەك دیوێكی دیكەی ژیانی ئەو سەركردەیەی كە گوزارشت لە بیر فراوانی و دنیابینیە تایبەت و دانسقەكەی دەكەن، هاوكات هەریەک لە بەشداربووان باس و بیرەوەری و سەرگوزشتەیەکی تایبەتی خۆیان لەگەڵ ئەو پیاوە نیشتمانییە گێڕایەوە و د. چیا عەباس و سامان شاسواریش، وەک دوو لە هاوڕێ نزیکەکانی کاک نەوشیروان، بەشێک لە بیرەوەری و سەختترین ساتەکانی ژیانی سیاسی و خەباتی ئەویان باس کرد.
لای خۆیانەوە بەرپرسانی ئەنجومەنەکان، ئەندامانی ژووری ڕەوەندی کوردی، بەرپرسانی گۆشەکان و نوێنەری جڤاتی گشتی لە ئەوروپا، گفتوگۆیان لەسەر ڕۆڵ و کاریگەریی هزری کاک نەوشیروان و پڕۆژەی گۆڕانکاری کرد.
لە کۆتایی کۆڕەکەدا جەخت لەسەر ئەوە کرایەوە کە هەرچەندە نۆ ساڵ بەسەر کۆچی دوایی کاک نەوشیرواندا تێپەڕیوە، بەڵام بیر و هزر و ئامانجەکانی هێشتا لە دڵ و هزری خەڵکی ئازادیخوازدا زیندوون، چونکە نەوشیروان مستەفا تەنها ناوێک لە مێژوو نەبوو، بەڵکوو مێژوویەک بوو لە خەبات، ڕۆشنبیری و دادپەروەری كە بۆ خاك و گەلەكەی ژیا، بەشداربوانیش بەهیواو ئومێدەوەو تەئکیدیان لەوەدەکردەوە کە درێژدەری پەیام و بەرنامەی ڕەوانشاد و بزوتنەوەی گۆڕان دەبن.