نوێنەری گۆڕان بۆ گەیاندنی دەنگی كورد بەهێزكردنی پەیوەندیەكان بەشداری بۆنەیەكی كاریگەر دەكات لە لیڤەرپول

فوئاد جەمال سەلام، ڕێکخەری ژوری رەوەندی کوردی، بەشداری کۆنفرانسی ساڵانەی (Labour Party) لە شاری لیڤەرپوولی بەریتانیا كرد، بە ئامانجی پتەوكردنی پەیوەندیەكان و بەشداركردن لە پانێڵەكانی پەیوەست بە دۆزی گەلی كورد و داكۆكیكردن لە یەكدەنگی و یەكهەڵوێستی و داخوازی و مافە رەواكان.
کۆنفرانسەکە، کە لە (٢٧ تا ٣٠ی ئەیلولی ٢٠٢٦)ی خایاند، بووە مەیدانێک بۆ گفتوگۆ لەسەر گۆڕانکارییە سیاسی، ئابووری و کۆمەڵایەتییەکانی بەریتانیا و ئاراستەی داهاتووی حیزب و تێیدا جەخت لەسەر پێشخستنی ئابووری، پشتگیریکردنی کار و کرێکاران، خزمەتگوزارییە گشتییەکان و گۆڕانکارییە سیاسییەکان کرایەوە، هەروەها کۆمەڵێک چالاکی و پانێڵی تایبەت بەڕێوەچوو.
لە گرنگترین بابەتەکانی پەیوەندیدار بە پرسە کوردییەکان، دوو پانێڵی تایبەت لە کۆنفرانسەکەدا ئەنجامدرا كەچەندین پەرلەمانتاری بەریتانیا و دۆستی گەلی کورد بەشداری کارایان تێیاندا هەبوو، ئەوانیش؛
 یەکەم بە ناونیشانی «دروستکردنی سوریایەکی نوێ: ڕۆڵی کورد لە داهاتوویەکی گشتگیر) کە بەشداری و ڕۆڵی کورد لە داهاتووی سیاسی و گشتگیریی سوریا لێکۆڵینەوەی لەسەر کرا، دووەمیش بە ناونیشانی «پەڕینەوەیەکی نوێ بۆ تورکیا ئاشتی، دیموکراسی و پرسی کورد» کە تەركیزی لەسەر پرۆسەی ئاشتی، دیموکراسی و دۆخی پرسی کورد لە تورکیا بوو.

لای خۆیەوە، فوئاد جەمال سەلام لە چوارچێوەی بەشداریکردنەکەیدا نامەی پیرۆزبایی بزوتنەوەی گۆڕانی لەرێگەی وەزیری بازرگانی، نوێکاری، زانست و پیشەسازیی بەریتانیا، گەیاندە سەرۆکی (Labour Party).
هاوكات ئەم بەشداریکردنە لە بۆنەكە و پانێڵەكانی، دەرفەتێکی گرنگ بوو بۆ ئەوەی پرسە کوردییەکان لە چوارچێوەی گفتوگۆ سیاسییەکاندا زیاتر ببیندرێن و دەنگی کورد لە کۆمەڵگەی سیاسی و مەدەنیی بەریتانیا بگاتە لایەنە پەیوەندیدارەکان.

ژوری ڕەوەندی کوردی بەردەوامە لە هەوڵدان بۆ فراوانکردنی پەیوەندییە سیاسی و کۆمەڵایەتییەکان و بەشداریی چالاکی کورد لە ژیانی گشتی و دیموکراتیکی بەریتانیا.