نوێنەرانی بزوتنەوەی گۆڕان بەشداری کۆنگرەی یەکی یەکێتی کۆمۆنەکانی کوردستانیانی لەندەن دەكەن

نوێنەرانی بزوتنەوەی گۆڕان، کە پێکهاتبوون لە ڕێکخەری ژووری ڕەوەندی کوردی و بەرپرسی پەیوەندییە دیپلۆماسییەکان، بەشداری کۆنگرەی یەکەمی یەکێتی کۆمۆنەکانی کوردستانیانی لەندەنیان کرد، کە بە ئامادەبوونی نوێنەرانی لایەنە سیاسسیەكان، ڕێکخراوە کوردی و کۆمەڵایەتییەکان لە شاری لەندەن بەڕێوەچوو.

لە سەرەتای کۆنگرەکەدا، بەڕێوەبەری دیوان بە شێوەیەکی تایبەت بەخێرهاتنی نوێنەرانی بزوتنەوەی گۆڕان کرد و ئاماژەی بە ڕۆڵ و شوێنپەنجەی بزوتنەوەکە كرد لە پشتیوانیکردن لە بنەماکانی دیموکراسی، هاوپشتی نێوان گەلان و پەرەپێدانی دیالۆگ و کارکردنی هاوبەش.

لە ناوەڕۆکی ڕاپۆرتە سیاسی و ڕێکخستنییەکانی کۆنگرەدا، جەخت لەسەر گۆڕانکارییە نێودەوڵەتی و ناوچەییەکان، گرنگی پەرەپێدانی دیپلۆماسی، بەهێزکردنی ڕێکخستن و دروستکردنی هاوپەیمانییەکان بۆ پاراستنی مافەکانی گەلان و بەرگری لە ئازادی و دیموکراسی کرایەوە. هەروەها، پارادایمی کۆمەڵگەی دیموکراتیک و پێویستی چارەسەری دیموکراتیک بۆ کێشەکانی ناوچە و دۆزی گەلی کورد بە شێوەیەکی فراوان باسکرا.

کۆنگرەکە گرنگییەکی تایبەتی بە ڕۆڵ و بەشداری ژنان و لاوان دا و جەختی لەسەر ئەوە کردەوە کە ژنان و لاوان هێزی سەرەکی گۆڕان، دیموکراسی و بنیاتنانی کۆمەڵگەیەکی ئازاد و دادپەروەرن.

نوێنەرانی بزوتنەوەی گۆڕان لە چوارچێوەی بەشدارییەکەیاندا، چەندین سەرنج و تێبینیان لەسەر گرنگی کار و هەوڵی هاوبەش، پێکەوەیی دیپلۆماسی و پەرەپێدانی پەیوەندییە سیاسی و کۆمەڵایەتییەکان خستەڕوو، جەختیان لەسەر ئەوە کردەوە کە یەکگرتوویی و هەماهەنگیی هێزە دیموکراتەکان و ڕێکخراوە کوردییەکان دەتوانێت خزمەتێکی گەورە بە بەرژەوەندی دۆزی ڕەوای گەلی کورد بکات و یارمەتیدەر بێت بۆ ناساندنی زیاتر و پاراستنی ماف و داواکارییە ڕەواکانی گەلی کورد لە ئاستی هەرێمی و نێودەوڵەتی.

کۆنگرەی یەکەمی یەکێتی کۆمۆنەکانی گەلانی لەندەن دووبارە جەختی لەسەر گرنگی هاوپشتی، یەکگرتوویی، دیموکراسی، دادپەروەری کۆمەڵایەتی و خەباتی هاوبەش بۆ ئاشتی و ئازادیی گەلان کردەوە، و بەشداری بزوتنەوەی گۆڕان لەم کۆنگرەیەدا هەنگاوێکی دیکە بوو بۆ بەهێزکردنی پەیوەندییە دیبلۆماسی و نەتەوەییەکان و پشتیوانی لە هەوڵە هاوبەشەکان بۆ خزمەتکردن بە دۆزی ڕەوای گەلی کورد.